خانەنشینان لە کۆیە
چاوەڕوانى موچە بە قسەى خۆش و نوکتە کورت دەکەنەوە
964+
دەریا ئەحمەد – کۆیە
دواکەوتنى دابەشکردنى موچە لە بانکەکان پەتى چاوەڕوانییەکانى درێژکردووەتەوە، بەڵام خانەنشینان بە گفتوگۆ و قسەى خۆش و نوکتە و باسکردن لە رابردوویان، چاوەڕوانییەکان کورت دەکەنەوە.
ئەمڕۆ یەکشەممە 30.11.2025، لە شارى کۆیە، خانەنشینان لەبەردەم بانک چاوەڕێی دەکەن تا کاتژمێر 1ـى پاشنیوەڕۆ دابەشکردنى موچە دەستپێبکات، بەڵام بۆ تیپەڕاندنى چاوەڕوانیان، دوو دوو و سێ سێ لە دەورى یەک کۆبوونەتەوە و دەستیانکردووە بە قسەى خۆش و باسکردن لە یادگارییەکانى رۆژانى رابردویان.
دلاوەر عەبدوڵا، خانەنشینێکە و بە پێکەنینەوە بە 964ـی وت، “هەر شەو دەزانم موچە درەنگ دەگات و دەبێ زۆر چاوەڕێ بکەین، بەڵام هەر خۆمان ناگرین لە ماڵەوە، دێین لێرە ئەو دۆست و هاوڕێیانەمان دەبینین کە ماوەیەکی زۆرە نەمانبینیوون و لێرەش لە چاوەڕوانى موچەدا دەست دەکەین بە قسەى خۆش و باسکردن لە رابردوو”.
ئەوان کە تەمەن و هیلاکی لەسەر روخساریان نیشتووە، کاتێک لە دەورى یەک کۆدەبنەوە و باس لە رابردوویان دەکەن، خەمى دواکەوتنى موچەیان لەبیر دەچێتەوە.
پێداچوونەوە: وریا فەتاح
