"لە %70 بازاڕمان زیادی كردووە"
بازاڕی لایت شەحن بەرناكەوێت و جوملەكەی لەبازاڕدا نەماوە
+964
ئەحمەد محەمەد -سلێمانی
بەهۆی نەبوونی كارەبای نیشتیمانییەوە، لەبازاڕی حەوزە وشكەكەی سلێمانی خواستێكی زۆر لەسەر لایتی شەحن دروست بووە و بەشێك لەدوكانەكان لایتیان نەماوە.
شادیار قاسم، یەكێك لە دوكاندارانی بازاڕی حەوزە وشكەكەی سلێمانییە و قسەی بۆ 964 كردووە و وتی، خواستێكی زۆر لەسەر كڕینی لایتی شەحن دروست بووە و بەجۆرێك ئەگەر رۆژانی ئاسایی دوو دانەمان فرۆشتبێت، ئەمڕۆ تا 15- 20 دانەمان لێ فرۆشتووە و لە %70 بازاڕمان زیادی كردووە.
وتیشی، وەكو تاك فرۆشی نرخەكان وەكو خۆیەتی، بەڵام لەبازاڕی كۆ فرۆشییەكاندا نرخی لایتەكان گران كراوە و ئەگەر لایتێكمان بە نرخی كۆ بە دوو هەزار كڕیبێت، ئەمڕۆ دوو هەزار و پێنج سەد دینار لەسەرخۆمان كەوتووە.
ئاماژەی بەوەشكرد، كڕیارمان هەبووە پێنج لایتی بردووەتەوە و وتویەتی نەوەكو لەبازاڕدا نەمێنێت، لەماوەی سێ مانگی رابردوو دا وەكو ئەمڕۆمان نەفرۆشتووە، بەجۆرێك رێژەی فرۆشمان بەرزبووەتەوە چەند كارتۆنمان هەبووە لەدوكان دامان ناوە و نەفرۆشراوە بەڵام ئەمڕۆ هەموویمان ساغكردووەتەوە.
پێداچوونەوە: پەری ساڵح
