لە هەولێر دوو هەزار مەتر دووجا رێگە نۆژەنکراوەتەوە

ئەحمەد مستەفا

لە سنووری سەرۆکایەتی شارەوانی هەولێر هەڵمەتێکی فراوانی چاککردنەوە و قیرتاوکردنی شەقامەکان بەڕێوەچوو، کە تێیدا دوو هەزار مەتر دووجا قیرکراوە و چەندین گەڕەک و شەقامی سەرەکی سوودمەند بوون لێی.

ئەم پڕۆژانە لە چوارچێوەی کارەکانی نۆژەنکردنەوە و راکێشانی رێگا بووە کە وەزارەتی شارەوانی و گەشتوگوزار و شارەوانیی هەولێر پلانیان هەیە بۆ نۆژەنکردنەوەی ژێرخانی شەقامەکان و ئاسانکاری بۆ هاتوچۆی هاوڵاتیان لە نێو گەڕەک و شەقامەکاندا.

ئەمڕۆ چوارشەممە 8.7.2026، وەزارەتی شارەوانی و گەشتوگوزار رایگەیاند، تیمەکانی شارەوانیی هەولێر توانیویانە بە بەکارهێنانی 325 تۆن قیری بەرهەمهاتوو، ڕووبەری زیاتر لە دوو هەزار مەتر دووجا لە شەقامە تێکچووەکانی شارەکە نۆژەن بکەنەوە و قیرتاوی بکەن.

ئەو شوێنانەی کە کارەکانیان تێدا ئەنجامدراوە بریتین لە:

– شەقامە تێکچووەکانی چوارڕیانی مامز لە نزیک پارکی شانەدەر.

– شەقامی نێو پێشانگەکانی ئۆتۆمبێڵ لە گەڕەکی ئازادی.

– چاککردنەوەی بەشێک لە شەقامی 100 مەتری.

– نۆژەنکردنەوەی چەند کۆڵانێک لە گەڕەکەکانی نازناز و ئاری.

– قیرتاوکردنی چەند شەقامێکی دیکە لە هەولێری نوێ، گەڕەکی کوردستان و ڕزگاری 2.

کۆمێنت (0)