قوڕ و خشت
خانووە بەردینەکانی برادۆست؛ نیو سەدە خۆڕاگری و هونەری تەلارسازی
964+
ئاکام غەفور – سۆران
مێژووی دروستکردنی خانووی بەردین دێرینترە لە خانووی قوڕ و خشت، هەر بەردێکیش لەم دیوارانەدا شایەتی دەدات لەسەر لێهاتوویی و هونەری تەلارسازیی باوباپیرانمان.
لە گوندی “بزنکرە”ی دەڤەری برادۆست، چەند خانوویەک ماون کە بە تاشەبەردی زەبەلاح و بە شێوازێکی ئەندازیاریی ناوازە دروستکراون؛ بەردەکان نزیکەی نیو مەتر پانن و هەندێکیشیان مەترێک درێژن، مێژووی دروستکردنیشیان بۆ نیو سەدە بەر لە ئێستا دەگەڕێتەوە.
ئەم خانووانە تێکەڵەیەک لە جوانی و پتەوین؛ بەهۆی دیوارە بەرد و قوڕەکانیانەوە زستانان گەرم و هاوینانیش فێنکن، مام ئەحمەد رەسوڵ دەڵێت: “ژیان لەناو ئەم دیواری بەردانەدا زۆر لە تەلارسازیی کۆنکریت خۆشترە و مرۆڤ هەست بە ئارامییەکی تایبەت دەکات.”
بەوتەی مام ئەحمەد، جاران خەڵک تەنیا پشتیان بە بەرد دەبەست، بەڵام بەهۆی قورسیی گواستنەوە و زەحمەتیی داتاشینی بەردەکان، دواجار گوندنشینان ناچار بوون روو لە دروستکردنی خانووی خشت بکەن.
پێداچوونەوە: ژێوار خدر
