ئەوەی زیندەوەربێت زیان ئەکات
پسپۆڕێک داوا دەکات خاکی ژێر ماددە رەشەکە هەڵبگیرێتەوە
964+
بڕوا مەجید – شـارەزوور
زیاتر لە دوو هەفتەیە ماددەیەکی رەش لە سنوری قەزای شارەزوور و چەند ناوچەیەکی پارێزگای سلێمانی دەڕێژرێت، بۆنێکی تیژی هەیە و هەرگیاندارێک کەوتبێتە ناوی بە سەلامەت لێی دەرنەچووە.
ئەرکان عوسمان، مامۆستای زانکۆ جیلۆجی ناس لە بواری نەوت بۆ 964 وتی، ئەم مادەیەی لە شارەزوور دەڕێژرێت پاشماوەی کارگەکان و پاڵاوگەکانی نەوتە و چەند مادەیەکی تری تێکراوە کە ترشیەکەیان دەگاتە یەک، زیانی بۆ ئاو و هەواو زەوی کشتوکاڵی و مرۆڤیش هەیە.
ئەو وتی، دەبێت بەشێوازێکی زانستی لەناوببرێت، ئەگینا لەداهاتوودا دەبێتە هۆی بڵاوبونەوەی نەخۆشی کوشندە، ئەم ماددەیە وەک تیرۆرێک وایە بۆ سەر ژینگە و سروشت.
رشتنی ئەو ماددە رەشە لە ناوچە جیاجیاکانی کوردستان و بەتایبەتیش لە سنووری پارێزگای سلێمانی چەند رۆژێکە دەستیپێکردووە، ئەگەرچی قەرار بوو، فەرمانگەی ژینگەی سلێمانی پشکنین بۆ ئەو ماددەیە بکات و ئەنجامی پشکنینەکە ئاشکرا بکات، بەڵام هێشتا ئەوەش نەکراوە.
964 ژمارەى ئەو تەنکەرەى دەستکەوتووە کە مادە رەشەکەى رشتووە و داوا لەلایەنە پەیوەندیدارەکان دەکات ئەگەر بەدواداچوون دەکەن ژمارەى تەنکەرەکەتان پێدەدات.
پێداچوونەوە: ئەحمەد مستەفا
