هاندەرانی نەورۆز تووڕەن و هەندێكیان بایكۆتی یارییەكان دەكەن

دیلان محەمەد جەزا – سلێمانی

یانەی نەورۆز نەیتوانی لە یاریگەی خۆی لە یانەی نەفتی بەسڕە بباتەوە، كە لە تیپەكانی كۆتایی ریزبەندییە و بە گۆڵێك یەكسان بوون، ئەمەش هاندەرانی یانەكەی تووڕە كرد و ناڕازین لە ئەنجامەكە، هەندێكیشیان دەڵێن نایەنەوە بۆ یارییەكان.

ئێوارەی ئەمڕۆ یەكشەممە 18.5.2025 یانەی نەورۆز لە یارییەكانی خولی ئەستێرەكانی عێراق، لە یاریگەی خۆی بە 1-1 گۆڵ لەگەڵ یانەی نەفتی بەسڕە یەكسان بوو.

ئەمەش یەكەم یاری بوو هاندەران بگەڕێنەوە یاریگە، دوای كەمبوونەوەی سزاكانی سەر یانەكە.

لەگەڵ ئەوەشدا هاندەرانی نەورۆز، بە ژن و پیاو و منداڵەوە هاتبوونە یاریگە و چاوەڕێی بردنەوە بوون، بەڵام بە دڵشكاوی گەڕانەوە ماڵەوە.

هاندەرانی یانەكە لە بەردەم یاریگەی نەورۆز بۆ 964 قسەیان كرد و بە گشتی ناڕازی بوون لە شێوازی پێكهاتە و پلانی راهێنەر قەحتان جسەییر و پێیان وایە سەركەوتوو نییە لە كارەكەیدا.

نەورۆز دوای ئەم ئەنجامە لە پلەی 12یە بە 43 خاڵ، یانەی نەفتی بەسڕەش لە پلەی 18یە و 29 خاڵی هەیە و كەوتووەتە سنووری دابەزین بۆ پلە نایاب.

پێداچوونەوە: ئەرسەلان عەبدوڵا