رێگای چوار گوند و سەیرانگایەکی بەسەرەوەیە
تەرخان نەکردنی پارە کارکردنی لە رێگای گوندی بیستانی راگرتووە
964+
کامیار کەمال – پێنجوێن
بەهۆی تەرخان نەکردنی پارەوە، قیرکردنی رێگای بیستان وەستاوە و پڕۆژەکە چاوەڕێی پارەیە بۆ ئەوەی قۆناغی یەکەمی دەستپێبکات.
بیستان گوندێکە لە ناحیەی گەرمک و رێگاکەش رێگای چوار گوند و سەیرانگای گۆڵێیە.
ئەمیر سۆفی جەمال لێپرسراوی پاراستن و چاککردنی رێگاوبانی پێنجوێن بە 964ی راگەیاند، رێگاکە بە دوو قۆناغ جێبەجێ دەکرێت و بۆ قۆناغی یەکەم نزیکەی 400 ملیۆن دیناری پێویستە بەڵام تەرخان نەکردنی پارە کارکردنی وەستاندووە.
وتیشی، پارەکە بە سێ سولفە تەرخان دەکرێت و سولفەی یەکەم 100ملیۆن دینارە و لە ئێستادا دەبێت بانک پارەکە تەرخان بکات، بەڵام بەهۆی نەبوونی پارەوە لە بانک نەتواندراوە بدرێتە کۆمپانیای جێبەجێکار.
ئەوەشی خستەروو، کۆمپانیاکە کاری تێدا دەسپێکردووە و تێکەڵرێژ و کوتانەوەی بۆ کراوە و تەنها قیرکردنی ماوە لەم قۆناغە کە سێ کیلۆمەترە.
هاوکات، رزگار قادر دانیشتوی گوندی بیستان بە 964ی راگەیاند، ئەو رێگایە چوار گوندی لەسەرە و بە سەیرانگای گۆڵێش بەستراوەتەوە.
باسی لەوەشکرد، جەندین جارە بەهۆی خەرجنەکردنی پارەوە چەندین جار ئەو پرۆژەیە وەستاوە و هەر تێکەڵەرێژ دەکرێت و دواتر رێگاکە بەجێ دەهێڵن و داواکارن کارەکانی رێگاکە تەواو بکەن.
