کێڵگەیەکى نەوت لە هەرێمی کوردستان _ وێنە: ئاژانسەکان
تیمێکی تەکنیکی پێکهێنراوە
سامانە سروشتییەکان: لەگەڵ بەغدا لەسەر هەناردەکردنەوەی نەوت رێککەوتین
964+
ژووری هەواڵ
وەزارەتی سامانە سروشتییەکان رایگەیاند، لەگەڵ وەزارەتی نەوتی حکومەتی عێراق لەسەر هەناردەکردنەوەی نەوتی کوردستان رێککەوتن.
ئەمڕۆ یەکشەممە 23.2.2025، وەزارەتی سامانە سروشتییەکانی هەرێمی کوردستان رایگەیاند، “دوای پەیوەندی و هەماهەنگی نێوان هەردوو وەزارەتی نەوتی فیدراڵی و وەزارەتی سامانە سروشتییەکانی حکومەتی هەرێمی کوردستان، رێککەوتین لەسەر دەستپێکردنەوەی هەناردەی نەوتی هەرێم بەپێی بڕی بەردەست”.
وەزارەتەکە راشیگەیاندووە، تیمێکی تەکنیکیی هاوبەش بەمەبەستی پشکنینی بۆرییەکانی هەناردەکردنی نەوتی کوردستان لەنێوان هەردوولادا پێک هێنراوە و پابەندبوونی خۆیان بە جێبەجێکردنی بڕگەکانی یاسای بودجەی گشتیی فیدراڵی دووپات دەکەنەوە.
دوێنێش، کۆمەڵەی پێشەسازی نەوتى کوردستان (ئەپیکور)، ئامادەیى کۆمپانیا نەوتییەکان بۆ دەستپێکردنەوەى هەناردەى نەوتى هەرێم پیشاندات، بەڵام مەرجى هەیە و دەڵێت، پێویستە گرێبەستی کارکردنیان لەبەرچاو بگیرێت.
دوای تێپەڕبوونی 22 مانگ بەسەر راگرتنی هەناردەی نەوتی هەرێمی کوردستان بڕیارە “بەمنزیکانە” هەناردەکردنەوەی نەوتی هەرێمی کوردستان دەستپێبکاتەوە.
