نزیکەی یەک ملیۆن گەشتیار لە مەرزی حاجی ئۆمەرانەوە هاتوچۆیان کردووە

شۆڕش قادری

لە 11 مانگدا نزیکەی یەک ملیۆن گەشتیار لە دەروازەی نێودەوڵەتی حاجی ئۆمەرانەوە هاتوچۆیان کردووە و ئامارەکە رووی لەزیادبوونە.

ئەرسەلان شوکری بەڕێوەبەری رێگاوبانی پارێزگای ورمێ لە رۆژهەڵاتی کوردستان بە ئاژانسی هەواڵی ئیرنای راگەیاندووە، “لە 21.3.2024 تائێستا سێ ملیۆن و 800 هەزار گەشتیار لە مەرزەکانی ورمێـوە هاتوچۆیان کردووە و لەو ژمارەیەش 982 هەزار و 971 کەسیان لەڕێی دەروازەی نێودەوڵەتی تەمەرچینـەوە (حاجی ئۆمەران) هاتوون و چوون”.

ئاماژەی بەوەش کردووە، هاتوچۆی گەشتیار لە نێوان ئێران و هەرێمی کوردستان بەراورد بە ساڵانی پێشووتر بە شێوەیەکی بەرچاو زیادیکردووە.

دەروازەی نێودەوڵەتی حاجی ئۆمەران لە 25 کیلۆمەتری قەزای چۆمان و 11 کیلۆمەتری شاری پیرانشار لە رۆژهەڵاتی کوردستان هەڵکەوتووە و بە یەکێک لە دەروازە بازرگانییە سەرەکییەکانی نێوان هەرێمی کوردستان و ئێران لەقەڵەم دەدرێت.