لە دهۆکەوە گەشتی عومرە دەكەن و بە شێوەی راستەوخۆ لە تیكتۆك دەیگوازنەوە

+964

هیڤی دێوالی- دهۆک

بۆ یەکەمجارە لەسەر ئاستی هەرێمی کوردستان، گەنجێکی دهۆک بە رێگای وشکانی بۆ ئەنجامدانی عومرە دەچێتە سعودیە، لە پاڵ ئەوە دەیەوێت ناوی بچیتە کتێبی گێنیس بۆ ژمارە پێوانەییەكان و بەرنامەی وایە لە دهۆکەوە تا سعودیە لە پلاتفۆرمی تیكتۆك لایڤ بكاتەوە.

ئەحمەد ئاکرەیی، ئەو گەنجەی دهۆكە و لەمبارەیەوە بە 964ی وت، بە مەبەستی عومرە دەیەوێت سەردانی سعودیە بکات و لە رێگەی پاسەوە گەشتەكە ئەنجام دەدات، لەگەڵ ئەوەشدا پلانی وایە لایڤی تیكتۆك بكاتەوە و بە درێژایی رێگاكە لە دهۆكەوە بۆ مەككە لایڤەكە بەردەوام بێت، بۆ ئەوەی ناوی بچێتە كتێبی گینیس بۆ ژمارە پێوانەییەكان.

ئاشكراشی كرد، بە پاڵپشتیی بەڕێوەبەرایەتیی ئەوقافی دهۆک و كۆمپانیایەكی بازرگانی كارەكەی ئەنجام دەدات، جگە لەوە پەیوەندی بە هەردوو كۆمپانیای گینیس بۆ ژمارە پێوانەییەكان و تیكتۆك كردووە لە دوبەی، بۆ ئەوەی لە كارەكەی ئاگاداریان بكاتەوە.

“لەم هەفتەیەدا لەگەڵ گرووپی حاجیان بە رێگای پاسە گەورەکان دەچینە سعودیە بە مەبەستی ئەنجامدانی عومرە، لە گەشتەکەدا چەندین بەرنامە و پرسیار لە عومەرەکاران دەکرێن و لە لایڤەکەدا بەشدار دەبن، ئێمە گرووپێکی چوار كەسین و بەرنامەكە بەڕێوەدەبەین، هیوادارین هاوڵاتیانی كوردستان و شاری دهۆک بەشداریی لایڤەكە بكەن و سەیری بكەن”، ئەحمەد ئاكرەیی وای وت.

بە گوێرەی زانیارییەكانی گەنجەكەی دهۆك، رێگەی دهۆك بەرەو سعودیە زیاتر لە 35 كاتژمێرە.

پێداچوونەوە: ئەرسەلان عەبدوڵا

حەج و عومرەی دهۆک بەدوای 11 کەسدا دەگەڕێت