بەڕێوەچوونی دەنگدانی تایبەت لە هەریمی کوردستان _ وێنە: 964
زۆرترینیان لە هەڵەبجە بووە
رێکخراوێک: لە دەنگدانی تایبەتدا پێشێلکاری بەرامبەر 19 رۆژنامەنوس کراوە
964+
ژووری هەواڵ
لە دەنگدانى تایبەت بۆ هەڵبژاردنى خولى شەشەمى پەرلەمانى کوردستان، رێکخراوێک 19 پێشێلکاریی بەرامبەر بە رۆژنامەنووسان تۆمار کردووە کە زۆرترینیان لە هەڵەبجە بووە.
رێکخراوی پەیامنێران بۆ ماف و گەشەپێدان، راپۆرتێکى لە بارەى پێشێلکارییەکان لە دژی رۆژنامەنووسان لە پرۆسەى دەنگدانی تایبەت بڵاوکردەوە و رایگەیاند، لە هەڵەبجە 15 پێشێلکارى، لە هەولێر سێ پێشێلکارى و لە دهۆک یەک پێشێلکارى بەرامبەر رۆژنامەنووسان تۆمارکراون، بەڵام لە سلێمانى هیچ پێشێلکاریەک تۆمار نەکراوە.
“لە رێگەى سەکۆی پەیامنێرانەوە کە ژمارەیان 180 پەیامنێرە لە سەرتاسەری هەرێمی کوردستان، چاودێری بارودۆخی تیمەکانی راگەیاندنمان کرد و ئاماری پێشێلکارییەکانمان تۆمارکردووە”، رێکخراوەکە وا دەڵێت.
بەگوێرەى راپۆرتی رێکخراوەکە، رۆژنامەنووسان بەشێوەیەکی “پرۆفیشناڵانە” و لە چوارچێوەى ئیتیکی رۆژنامەنووسی بەشێوەیەکی “پیشەییانە” کارەکانیان ئەنجامداوە.
رێکخراوی پەیامنێران بۆ ماف و گەشەپێدان داوا دەکات، لە دەنگدانی گشتیدا هێزە ئەمنییەکان و دەزگا حکومییەکان بە شێوەیەکی ئاشتیانە مامەڵە لەگەڵ رۆژنامەنووسان بکەن و رێگری لە کارەکانیان نەکەن.
دوێنێ هەینی 18.10.2024 لە پرۆسەی هەڵبژاردنی خولی شەشەمی پەرلەمانی كوردستان، پرۆسەی دەنگدانی تایبەت بەڕێوەچوو، سبەی یەكشەممەش دەنگدانی گشتی بەڕێوەدەچێت.
