قایمقامیەتی شارباژێڕ دەڵێ سبەی نەوت دێت

964+

ئەحمەد مستەفا

قایمقامیەتی قەزای شارباژێڕ لە بڵاوکراوەیەکدا، دانیشتووانی سنووری شارباژێڕ و گوندەکانی ئاگادار دەکاتەوە، کە سبەی نەوتی ماڵان دابەشدەکرێ و بەرمیل ئامادە بکەن.

لە بڵاوکراوەکەدا ئاماژە بەوە کراوە، رۆژی چوارشەممە 2.10.2024، نەوت بەسەر دانیشتووانی سنوورەکە دابەشدەکرێت و پێویستە سەرۆک خێزانەکان پسوڵەی نەوتیان پێ بێت و بڕی 104 هەزار دینار ئامادە بکەن.

پێشتر، وەزارەتى سامانە سروشتییەکان ئاشکراى کرد، بۆ وەرزى زستانى ساڵى 2024 – 2025، زیاتر لە 10 ملیۆن لیتر نەوتی سپی بەسەر زیاتر لە 52 هەزار خێزان لە ناوچە شاخاوییەکان دابەش کراوە، کە بڕى 58 ملیۆن 848 هەزار و 527 لیتر نەوتى سپى بۆ هەرێمى کوردستان هاتووە و لەو بڕە 10 ملیۆن و 451 هەزار و 400 لیتر دابەشکراوە.

روون کراوەتەوە کە 2%ـى دانیشتووانى هەولێر، 2%ـى دانیشتووانى سلێمانى، 4.5%ـى دانیشتووانى دهؤك، 7%ـى دانیشتووانى ئیدارەى سەربەخۆى زاخۆ، 14%ـى دانیشتووانى هەڵەبجە، 12.5%ـى دانیشتووانى ئیدارەى سۆران، سوودمەند بوون لە وەرگرتنى نەوت.

بەپێى ئەو ئامارەى کە وەزارەتى سامانە سروشتییەکان خستوویەتییەڕوو، لە کۆى یەک ملیۆن و 291 هەزار و 296 خێزان، 52 هەزار و 257 خێزان سوودمەند بوون لە وەرگرتنى نەوت، بۆ هەر بەرمیلێک نەوت، بڕى 104 هەزار دینار لە هاوڵاتیان وەردەگیرێت و ئەوەش ناڕەزایەتى لێکەوتووەتەوە و لە رۆژانى رابردوودا ژمارەیەک لە دانیشتوانى پشدەر ئامادە نەبوون بەو نرخە نەوتەکە وەربگرن.

ئەو هاوسەرانەی کۆبوونی خۆراکیان جیانەکردووەتەوە دەتوانن نەوت وەربگرن

"سلێمانی لە پشدەرەوە نەوت دابەشکردن دەست پێدەکات"