کۆپتەری تورکی ئاگری لە دەوروبەری چەند گوندێکی ئامێدی بەرداوە

+964

هێڤی دێوالی -دهۆک

لە بەیانییەوە لە گوندەکانی دەوروبەری دێرەلووکی سەر بە ئامێدی دەنگی تەقوتۆق دێت، خەڵکەکە بە چاوی خۆیان سووڕانەوەی کۆپتەری تورکییان بینیوە و دوای ئەوەش چەند دەنگێکی گەورە هاتووە و ئاگر لە دەوروبەری گوندەکان کەوتووەتەوە.

زیاد لە دوو شایەتحاڵ لە خەڵکی ناوچەکە بە پەیامنێری 964یان وت کۆپتەر بە ئاسمانی گوندەکانی بلاڤە و گوهەرزێ دەسووڕێنەوە و چەند شوێنێکیان بۆردومان کردووە، ئەم گوندانە سەر بەئامێدین، ئەو ناوچەیەیە کە ماوەیەکی زۆرە تورکیا هێزی بۆ دەهێنێت و دەڵێت شەڕی پەکەکە دەکات.

ئەحمەد گوهەرزێیی، موختاری گوندی گوهەرزێ بە 964ی وت ”لە بەیانییەوە کۆپتەرەکانی سوپای تورکیا چەند جارێک ئاقارەکانی دەوروبەری گوندەکەمانیان بۆردومان کردووە، ئێستا ئاگر لە خوارووی گوند کەوتووەتەوە و مەترسی لەسەر گوندەکەشمان هەیە”.

موختار ناڕەحەتە لەوەی هیچیان پێ ناکرێت و دەڵێت ”هێزە ئەمنییەکان ناهێڵن گەنجەکانمان بچن ئاگرەکە کۆنترۆڵ بکەن، دەڵێن مەترسی هەیە، تائێستا ئاگرەکە بەردەوامە و چەند دۆنمێکمان سووتاوە، پێشتریش 300 دۆنم پووش و پەڵاش و داری بەرهەمدارمان لە بۆردوماندا سووتاوە”.

پەیامنێری 964 لە خەڵکی گوندی دێرێ گوێی لێبوو کە کەمێک پێش ئێستا دەنگێکی گەورە هاتووە، دەڵێن درۆنی تورکی بووە کەوتووەتە خوارەوە، دێرێ نزیکە لە بلاڤە و گوهەرزێ، بەڵام هێشتا زانیاری یەکلاکەرەوە دەست نەکەوتووە، هەر ئەوەندەی ساغ بووەوە بە هەواڵێکی جیا بڵاوی دەکەینەوە.

تورکیا چەند ناوچەیەکى هەرێمى کوردستانى بۆردوومان کرد