منداڵەکانتان ببەن بۆ ناونووسین
هەزار منداڵ بەشداریی ماراسۆنی هەولێر دەكەن
964+
ئەرسەلان عەبدوڵا
لە هەولێر ماراسۆن بۆ وەرزش و خۆشی بۆ منداڵان رێكدەخرێت و بڕیارە هەزار منداڵ بەشداریی تێدا بكەن.
عەبدولستار یونس سەرۆكی رێكخراوی ئەربیل ماراسۆن بۆ وەرزش و ئاشتی ئەمڕۆ چوارشەممە 3.7.2024 بە 964ی راگەیاند، “بۆ زیاتر برەودان بە وەرزشى منداڵان، راکردنى خۆشى منداڵان بۆ هەزار منداڵى تەمەن 6 بۆ 13 ساڵ ئەنجام دەدرێت و بەشداریكردنیش كراوەیە”.
وتیشی، “رۆژى شەممەی داهاتوو 6.7.2024 کاتژمێر 6ی ئێوارە ماراسۆنەكە بەڕێوەدەچێت، كە خاڵى دەستپێک پارکى سامى عەبدولڕەحمان، دەرگاى گوڵان بەرامبەر گەڕەکى وەزیران دەبێت و كۆتاییەكەشی هەر لە ناو پارك دەبێت.
عەبدولستار یونس ئاماژەی بەوەش دا، لە دوێنێوە ناونووسین دەستیپێكردووە و تا هەینی بەردەوام دەبێت، بنکەى ناونوسین و وەرگرتنى تیشرت و ژمارە لە كاتژمێر 5:00ی ئێوارە تا 11ی شەو لەناو پارکى سامى و لە تراكی راكردن كراوەیە و ئەوانەی دەیانەوێت منداڵەكانیان بەشداری بكات دەتوانن سەردانی ئەوێ بكەن.
رێكخراوی ئەربیل ماراسۆن هەروەها ژمارەی تەلەفۆنی 07507770578ی داناوە بۆ ئەوانەی دەیانەوێ زانیاری زیاتر لە بارەی ماراسۆنەكەی منداڵان وەربگرن.