لە سلێمانی 100 کارمەندی تەندروستی دادەمەزرێن

ژووری هەواڵ

حکومەتی هەرێمی کوردستان رەزامەندی داوە بۆ دامەزراندنی کارمەندی پێویست بۆ نەخۆشخانەی ئەڵمانی لە سلێمانی، وەزیری تەندروستیش دەڵێت، 200 کارمەندی دیکەش بۆ هەولێر و دهۆک دادەمەزرێن.

ئەمڕۆ پێنجشەممە 16.5.2024، دکتۆر هێرش سەلیم، جێگری بەڕێوەبەری تەندروستی سلێمانی بە 964ـی راگەیاند، بەگوێرەی ساڵی خزمەت و خۆبەخشی، 100 کارمەند کە سیڤیان ناردووە دادەمەزرێن و رەزامەندی وەرگیراوە.

نەخۆشخانەی ئەڵمانی لە سلێمانی، لەلایەن رێکخراوی GIZـی ئەڵمانی لەکاتی بڵاوبوونەوەی کۆرۆنا لەسەر رووبەری 10 ھەزار مەتر دووجا دامەزراوە و ئەم بەشانە لەخۆ دەگرێت: چاودێری چڕ، تاقیگە، قاوش، سۆنەر، تیشک و ستی سکان.

رێکخراوی GIZـی ئەڵمانی دوو نەخۆشخانەی دیکەی لە هەولێر و دهۆک دروستکردووە، بە وتەی وەزیری تەندروستی، 200 کارمەندی دیکەش بۆ ئەو دوو نەخۆشخانەیە دادەمەزرێندرێن.