5 کیلۆمەتر لە سەنتەرى شارەوە دوورە
نزیکەى یەک ملیار دینار بۆ دروستکردنى دەروازەى دوزخورماتوو خەرج دەکرێت
964+
سیروان خورشید – دوزخورماتوو
بۆ یەکەمین جارە، دەروازەی شار بۆ هەردوو بەشی باکو و باشوری قەزای دوزخورماتوو دروست دەکرێت و تێچووەکەشى 960 ملیۆن دینارە.
مەرعی رەشید، سەرۆکی شارەوانی خورماتوو بە 964ـی وت،”ماوەی هەفتەیەکە دەستیان بە دروستکردنی هەردوو دەروازەی باکور و باشورى قەزاکە کردووە کە بە شێوازێکی تەلارسازی دروست دەکرێت و بڕیارە لە ماوەى یەک ساڵدا تەواو بکرێت”.
درێژى هەر دەروازەیەکیان نۆ مەترە و 16 مەتریش پانن، کە هەریەکەیان پێنج کیلۆمەتر لەناوەندی قەزاکەوە دوورن.
قەزای دوزخورماتوو کە یەکێکە لە قەزا هەرە گەورەکانى عێراق، لەڕووی ئیدارییەوە سەر بەپارێزگای سەڵاحەدینەو دەکەوێتە سەر رێکای کەرکووک – بەغدا، بەدوری 75کیلۆ مەتر دەکەوێتە باشوری پارێزکای کەرکوک و 149 کیلۆ مەتریش لە خۆرهەڵاتى پارێزگاى سەڵاحەدینەوە دوورە.
پێداچوونەوە: وریا فەتاح
