964+
بە چەکى بێمۆڵەت خۆى نمایش کردووە
ئاسایشی هەولێر سناپچیەکی دەستگیرکرد
964+
وریا فەتاح
ئاسایشى هەولێر، دەستگیرکردنى تۆمەتبارێکى راگەیاند کە بە چەکى بێمۆڵەت خۆى نمایش کردووە، ئەو کەسە لە سناپچات ریکلام و کارەکانی بڵاودەکردەوە.
ئەمڕۆ پێنجشەممە بەڕێوەبەرایەتى ئاسایشى هەولێر لە رونکردنەوەیەکدا رایگەیاندووە، لەدرێژەی هەڵمەتی رووبەڕوبونەوەی قەدەغەکردنی هەڵگرتنی چەکی بێمۆڵەت و بڵاو کردنەوەی وێنەو گرتەڤیدۆی کاتی تەقەکردن لەتۆڕە کۆمەڵایەتیەکان، بە بڕیارى دادوەر، تۆمەتبار (م، ح ، ع) کە کاری ڤاینەری دەکات لەتۆڕەکۆمەڵایەتییەکان لەلایەن هێزەکانمانەوە دەستگیرکرا.
بەپێى راگەیەنراوەکە، تۆمەتبار چەکى بێمۆڵەتى هەڵگرتووە و وێنە و ڤیدیۆ بە چەکە بێمۆڵەتەکەوە، لە تۆڕە کۆمەڵایەتییەکان بڵاوکردووەتەوە.
964 زانیویەتى، تۆمەتبارەکە کەسێکى دیارى ناو شۆشیاڵ میدیایە و لە شارى هەولێر دادەنیشێت.
ئاسایشى هەولێر دوپاتى دەکاتەوە، هەرکەسێک چەکی بێمۆڵەتی لابێت یان گرتەڤیدۆیی چەک و کاتی تەقەکردنی لەتۆڕەکۆمەڵایەتییەکان بڵاو بکاتەوە، بە بڕياری دادگا لەلايەن دەستگیر دەکرێت.
