ئۆتۆمبێلێک لە چیای حەسەن بەگ وەرگەڕاو کەسێک گیانی لەدەستدا

964+

ئاکام غەفور – سۆران

لە چیای حەسەن بەگ لە سنوری سۆران ئۆتۆمبێلێک لە شاخ هەڵدێرا، کەسێک گیانی لەدەستدا و سێ کەسیش بریندار بوون.

ئۆتۆمبێلەکە لە جۆری پیکاب مستەربۆشی بووە، چوار گەنجی تێدا بووە کە دووانیان 18 ساڵن دووانەکەی تریان تەمەنیان 19 ساڵن.

موحسین تەحسین وتەبێژی هاتوچۆی سۆران بە 964ـی وت، ئێوارەی ئەمڕۆ ئاگادار کراینەوە لە بوونی روداوێکی هاتوچۆ، رووداوەکە لە چیای حەسەن بەگ بووە بە رووی شاری سۆران، سەیارەکە لە رێگا هەڵدێراوە و پێدەچێت لە ناو بەفر بووبن.

وتیشی، کەسێک گیانی لە دەست داوە و سێ کەس بریندارن و رەوانەی نەخۆشخانە ی ئاشتی کراون لە سۆران.

بەشی فریاکەوتنی نەخۆشخانەی ئاشتی بە 964ـی وت، دوو لە بریندارەکان بەهۆی سەختی برینەکەیان بۆ هەولێر بەڕێ کراون و پێویستیان بە چاودێری چڕە ئەوەی تریان تەندروستی جێگیرە

پێداچوونەوە: توانا نەقی