بەنزین لە کوردستان گران بوو

964+

فه‌رهاد حه‌سه‌ن

نرخى به‌نزین له‌ هه‌رێمی كوردستاندا به‌ره‌و گرانبوون ده‌چێت، له‌ هه‌ولێر 10 تا 15 دینار و له‌ سنوورى سلێمانیش 50 دینار چووه‌ته‌ سه‌ر نرخى هه‌ر لیترێك.

بەهمەن شێخ قادر، وتەبێژی بەنزینخانەکانی سلێمانی به‌ 964ـى وت لە دوێنێوه‌ نرخی بەنزین لە سلێمانی گران بووه‌، هۆکارەکەشی بۆ بوونی کێشە لە هاوردەکردنی بەنزین و بەرزبونەوەی نرخی دۆلار دەگەڕێنێتەوە.

ئاماژه‌ى به‌وه‌ش كرد، بەنزینی نۆرماڵ 50 دینار و سوپەر 50 دینار و موحەسەنیش 25 دینار هاتووه‌ته‌ سه‌ر نرخى هه‌ر لیترێك.

هه‌رچی سیروان عەبدوڵڵا خدر، سەرۆکی ئەنجوومەنی بەنزینخانەکانی هەولێره‌، به‌ 964ـى وت، له‌ سنوورى هه‌ولێر گرانبوونى نرخى به‌نزین به‌و شێوه‌یه‌ نییه‌.

وتی “بۆ هه‌ر لیترێك 10 تا 15 دینارى چووه‌ته‌ سه‌ر” .

وتەبێژی بەنزینخانەکانی سلێمانی، روونیكرده‌وه‌، ماوەی 15 رۆژە کێشەی بەنزین دروست بووە و ئەم چەند رۆژە کێشەی بەرزبوونەوەی بەهای دۆلاری بەرامبەر بە دیناریشی هاتوەتە سەر، بۆیە نەتوانراوە رێگری لە بەرزبوونەوە بکرێت، بەڵام کوالێتی وەک خۆی دەمێنێتەوە.