هەرێم ٥٪ـی پێویستییەکانی لە ناوخۆدا پڕ دەکاتەوە
قەبارەی هاوردەی ئەمساڵی هەرێم نزیکەی ١٨ ملیار دۆلارە
+964
پێشەوا محەمەد – سلێمانی
قەبارەی هاوردەی هەرێم بۆ ئەمساڵ لە وڵاتانی ئێران و تورکیاوە نزیکەی ١٨ ملیار دۆلارە. یەکێتیی هاوردە و هەناردەکارانی هەرێم دەڵێت، هەرێم بۆ پڕکردنەوەی پێویستییەکانی بە رێژەی ٩٥٪ پشت بە دەرەوە دەبەستێت.
زانیارییەکانی یەکێتییەکە بۆ 964+ـی روون دەکاتەوە، ئێران و تورکیا دوو وڵاتی سەرەکین کە عێراق و هەرێم بۆ پڕکردنەوەی پێداویستییەکانیان پشتیان پێ دەبەستن.
“ئەمساڵ بە بەهای ١٠ ملیار دۆلار هاوردەی کاڵا و شمەک لە تورکیاوە کراوە و بەشێکی بۆ عێراق بووە، هەروەها بە بەهای نزیکەی ٨ ملیار دۆلاریش لە ئێرانەوە شمەک هاوردە کراوە”، عەتا محەمەد، جێگری سەرۆکی یەکێتیی هاوردە و هەناردەکارانی هەرێم وای بە 964+ وت.
لەناوخۆدا هەرێم توانای پڕکردنەوەی ٥٪ـی پێویستیییەکانی هەیە
دەشڵێت، لەناوخۆدا هەرێم توانای پڕکردنەوەی ٥٪ـی پێویستیییەکانی هەیە.
جگە لە هەردوو فڕۆکەخانەی نێودەوڵەتیی هەولێر و سلێمانی، هەرێمی کوردستان پێنج دەروازەی فەرمیی لەگەڵ وڵاتانی تورکیا و ئێران هەیە و ئاڵوگۆڕی بازرگانی و هاتووچۆی گەشتییارییان لێوە دەکرێت.