لە عێراقدا ژمارەی نێر لە مێ زیاترە

فەهمی نەبی

وەزارەتی پلاندانانی عێراق لە رۆژی جیهانیی دانیشتوواندا رایگەیاندووە، ئێستا ژمارەی دانیشتووانی عێراق زیاترە لە 43 ملیۆن کەس، نیوەی ئەو ژمارەیە لە هەریەکە لە پارێزگاکانی بەغدا، نەینەوا، بەسڕە و زیقاڕ کۆبوونەتەوە.

نەتەوە یەکگرتووەکان، رۆژی 11ی تەمووزی هەموو ساڵێکی وەک رۆژی جیهانیی دانیشتووان دیاریکردووە، وەزارەتی پلاندانانی عێراق رایگەیاندووە، ژمارەی دانیشتووانی عێراق 43 ملیۆن و 324 کەسە، لەو رێژەیە %70ی لە شارەکان و %30 لە گوندەکانەق دەژین.

بە گوێرەی ئامارەکەی وەزارەتی پلاندانانی عێراق، لەو رێژەیەی رایگەیاندووە، %50.5ی نێر و %49.5ی مێیە.

لە راگەیەندراوەکەی وەزارەتی پلانداناندا هاتووە، ئەوان ئامادەکاریی دەکەن لە ساڵی 2024 سەرژمێری دانیشتووان بکەن.

بە گوێرەی ئامارەکە، رێژەی گەشەی دانیشتووان لە عێراقدا ساڵانە، %2.5 بووە، ئەوانەی تەمەنیان لە خوار 15 ساڵیە، %40ی دانیشتووان پێکدەهێنن، ئەوانەشی تەمەنیان لە نێوان 15 بۆ 64 ساڵییە، رێژەی %57ی دانیشتوان پێکدەهێنن.

وەزارتی پلاندان رایگەیاندووە، رێژەی گەنج لە عێراق %28 ئەوانەی تەمەنیان لە نێوان 15 بۆ 24 ساڵیدایە.

بە پێی ئاماری نەتەوە یەکگرتووەکان، ژمارەی دانیشتووانی گۆی زەوی ئەمڕۆ سێشەممە گەیشتووەتە، هەشت ملیار و 45 ملیۆن کەسە، دەستەی ئاماری هەرێمی کوردستانیش دەڵێت، ژمارەی دانیشتووانی هەرێمی کوردستان، شەش ملیۆن و 500 هەزار کەس دەبێت.