سەرووی هەزار تابلۆ کراون بە کوردی

فەهمی نەبی

پێنج مانگ دەبێت بڕیاری گۆڕینی تابلۆی دوکانەکان بۆ زمانی کوردی دەرچووە، بەڵام شارەوانی هەولێر دەڵێت، تا ئێستا هەزار و 187 دوکان و شوێنی بازرگانی تابلۆکانیان کراون بە کوردی.

ئەمڕۆ دووشەممە شارەوانی هەولێر رایگەیاند، لە 16.3.2023 نوسراویان بۆ هەر شەش شارەوانیەکەی سنووری پارێزگای هەولێر کردووە و ئاگادارکراونەتەوە کە دەبێت ناوی تابلۆ و دوکان و خوێندنگەکان ئەوانەی بە زمانی بیانین پێویستە بگۆڕدرێن بۆ زمانی کوردی.

سیامەند کەریم، وتەبێژی شارەوانی هەولێر دەڵێت، سەرەتا وەسڵێک بەدوکان و ئەو شوێنە دەدرێت کە تابلۆی داناوە، ئەگەر دوای یەک رۆژ نەیگۆڕێت تیمی شارەوانی تابلۆکە لادەدات.

رۆژی 21.2.2023 سەرۆکی حکومەتی هەرێم بڕیاریدا، بۆ لەمەودوا پێویستە شوێنە بازرگانی و قونسوڵخانەکان تابلۆکانیان بگۆڕن بۆ زمانی کوردی، دوای ئەو بڕیارە پارێزگای هەولێر 35 رۆژ مۆڵەتی دا بە دوکان و شوێنە بازرگانی و قونسوڵخانەکان بۆ ئەوەی تابلۆکانیان بگۆڕن، بەڵام دوای پێنج مانگ هێشتا بەشی هەرە زۆری تابلۆکان نەگۆڕدراون.