ئەو جوتیارانەی گەنمیان سووتاوە قەرەبوو ناکرێنەوە

964+

پێشەوا محەمەد

ئەو جوتیارانەی گەنمیان سووتاوە قەرەبوو ناکرێنەوە و وەزارەتی کشتوکاڵیش دەڵێت، داوای بودجەیان کردووە و بۆیان دابین نەکراوە.

ئێستا کە وەرزی دروێنەی گەنمە لێرە و لەوێ زەوی بە گەنم چێندراوی جوتیاران دەستووتێت.

بەر لە کابینەی نۆی حکومەتی هەرێم، وەزارەتی کشتوکاڵ بودجەیەکی بەناوی “پاڵپشتیکردنی کەرتی کشتوکاڵی” هەبووە و لەو بودجەیە ئەو جوتیارانە قەرەبوو دەکرانەوە کە گەنمیان دەسووتا، بەڵام ئێستا بودجەکە نەماوە.

“ئەگەر بودجەمان لەبەردەست بووایە ئەو جوتیارانەمان قەرەبوو دەکردەوە، کە گەنمیان سووتاوە و هیچ کەمتەرخەمییەکی خۆیانی تێدا نەبووە”، ئەوە وتەی هیوا عەلی، وتەبێژی وەزارەتی کشتوکاڵی حکومەتی هەرێمە بۆ 964.

دەشڵێت، وەزارەتی دارایی پێیراگەیاندوون ناتوانن ئەو بودجەیەیان بۆ دابین بکەن.