لە کاتی ئامادەکاریدا گیانی لەدەستدا

964+

دیلان محەمەد جەزا

کارمەندێکی رێکخراوی منداڵپارێزی کوردستان لەکاتی هەڵواسینی پۆستەری رۆژی جیهانی منداڵان لە نهۆمی سەرەوەی ئۆفیسی رێکخراوەکە دەکەوێتە خوارەوە و دەستبەجێ گیان لەدەستدەدات.

پەیامنێری 964 دەڵێت، رووداوەکە ئێوارەی دوێنێ روویداوە بەڵام درەنگی شەو مردنی کارمەندەکە راگەیەندراوە.

بینای رێکخراوی منداڵپارێزی کوردستان لە سلێمانی، بە تەنیشت رەنگ گەلەرییە و بینایەکی پێنج نهۆمییە و کارمەندەکە لە نهۆمی سەرەوە کەوتووەتە خوارەوە.

ناوی کارمەندەکە (ئـ . ع.)، دوای کەوتنە خوارەوەی دەبردرێتە پزیشکی دادی سلێمانی و راپۆرتی پزیشکی لەسەر رووداوەکە بۆ دەکەن.

نوعمان عەبدولرەحمان، ئاڕاستەکاری پەیوەندیەکان و ھەماھەنگی لە منداڵپارێزی کوردستان بە 964 راگەیاند، رووداوەکە لە بینای منداڵپارێز روویداوە و سەرقاڵی ئامادەکاری بووین بۆ رۆژی جیھانی منداڵان.

ئەمڕۆ پێنجشەممە 1.6.2023، رۆژی جیهانی منداڵانە لە جیهاندا، ساڵانە رێکخراوی منداڵپارێزی کوردستان دەیان چالاکی جۆراوجۆر بەو بۆنەیەوە ئەنجامدەدات.

پێداچوونەوە: فەرمان سادق