بێلا حەدید .. شیکترین خانمی هەسارەی زەوییە

+964

پەرستۆ ساڵح – هونەری

نمایشکاری جیهانی، بێلا حەدیدی بە رەگەز فەلەستینی، نازناوی شیکترین خانمی هەسارەی زەوی پێبەخشرا.

گۆڤاری(GQ) ـی بەریتانی کە تایبەتە بە بواری مۆدە، لیستی خۆی بۆ شیکترین کەسایەتییەکانی جیهان بۆ ساڵی ٢٠٢٢ بڵاوکردەوەو، بێلا حەدید وەک شیکترین خانمی سەر هەسارەی سەر زەوی دەستنیشانکرد.

لەناو لیستی شیکترینەکانی جیهان، هەریەکە لە هاری ستایلز گۆرانیبێژ، ئادەم ساندلێر ئەکتەر، جەیدن سمیس ئەکتەر، خانمە زێندایا ئەکتەر، جەستن بیبەر گۆرانیبێژ، کیم کارداشیان کچە نمایشکار بوونیان هەبوو، هەروەها چەندان کەسایەتی دیکەش لە لیستەکە بوون.

گۆڤارەکە لەبارەی پیدانی نازناوی “شیکترین خانمی هەسارەی زەوی” بە خانمە مۆدێل و نمایشکار بێلا حەدید، بۆ ئەوە دەگەڕێنێتەوە کە لەهەموو جۆرە نمایش و فاشیۆنێکی تایبەت بە خانمان و پیاوان و جلوبەرگی ئێواران و وەرزشی و بۆنەکان، شیک و ناوازە دەردەکەوێت.

گۆڤاری (GQ) دەڵێ؛ بێلا حەدید مۆدەی پیاوان لە خودی پیاوانیش باشتر لەبەر دەکات، هەروەها دەتوانێت لە هەموو شتێکدا رەنگین دەربکەوێت، لە تیشێرت و جلی ئێوارەی کلاسیکەوە تا چاکەتی جینز و تەنانەت لە بۆینباخ بەستنیشدا، بەو پێیەی شێوازی گەنجانەیە.

بێلا حەدید، لە ریزی گرانترین کچە مۆدێلەکانی جیهان دایەو کۆمپانیاکان لە رکابەری سەختدان بۆ گرێبەست لەگەڵیدا، ئەو کچە نمایشکارە تەمەن ٢٦ ساڵە بە رەچەڵەک فەڵەستینییە داهاتی ساڵانەی ١٩ ملیۆن دۆلارە.

،بێلا حەدید، کچی محەمەد حەدیدە کە بە رەچەڵەک فەڵەستینین بەڵام ئێستا رەگەزنامەی ئەمەریکی هەیەو یەکەێکە لە بازرگانە بەناوبانگەکانی ئەمەریکا، جگە لە بێلا، ئەوا جیجی خوشکیشی نمایشکارەو، هەروەها یۆلاندای دایکیشی کە بە رەچەڵەک دانیمارکییە، ئەویش نمایشکارە.

بێلا حەدید لە تەمەنی ١٦ ساڵیدا چووەتە بواری مۆدێل، لەو کاتەوە تا ئێستا ٢٧ جار لە بەرگی گۆڤاری بەناوبانگی “ڤۆگ” دەرکەوتووە، هەروەها بەشداری لە ئاهەنگی فەلەستینی عەرەبی کردووە کە لەم دواییانەدا لە قەتەر بەڕێوەچوو، شانازیش بە بنەچە فەلەستینییەکەیەوە دەکات، کە لە چاوپێکەوتنەکانیدا درێغی ناکات لە قسەکردن لەسەری.