ئەمساڵ سن و کیسەڵەش کار لە بڕشتی گەنمی گەرمیان ناکات

964+

هونەر فارس – گەرمیان

سن و کیسەڵە زیانی ئەوتۆ بە دانەوێڵەی گەرمیان ناگەیەنێت و ئەمساڵ هەر دۆنمێک 700 کیلۆ گەنمی تێدا دەبێت، بە مەزەندەی کشتوکاڵی گەرمیان.

دوای باران بارینی زۆر و تێپەڕاندنی وشکەساڵی لە گەرمیان، کشتوکاڵی گەرمیان جوتیاران دڵنیا دەکاتەوە کە دانەوێڵەکانیان بە بڕشتدەبێت.

“زیانی سن و کیسەڵە لەچاو دانەوێڵەی ناوچە کوێستانیەکان، لە گەرمیان بە سفر حیسابە”. شادیە حسێن، بەڕێوەبەری کشتوکاڵی گەرمیان وادەڵێت، ئەوەش دەخاتەڕوو کە لە گوندەکانی نێوان قۆرەتوو – مەیدان، کە زیاتر لە ناوچە کوێستانیەکانەوە نزیکن، رێژەیەکی کەمی مێروو هەیە، بەڵام دەرمان دەکرێن و زیانی ئەوتۆیان نابێت.

دەشڵێت: پێشبینی دەکەین ئەمساڵ هەر دۆنمێک زەوی 700 کیلۆ گەنمی تێدا بێت.

ئەمساڵ لە سنووری گەرمیان 184 هەزار و 354 دۆنم  زەوی کشتوکاڵی لەلایەن سێ هەزار و 654 جوتیار بە گەنم چاندراون، مەزەندە دەکرێت بڕی 143 هەزار و 252 تۆن گەنم بەرهەمی هەبێت.

پێداچوونەوە: فەرمان سادق