پردی رێگای پشتێنەیی ئاو بردی و رێگایەکی دیکە کرایەوە بۆ بارهەڵگرەکان

سیروان خورشید – خورماتوو

دوای ئەوەی لە چەند ۆژی رابردوودا بەهۆی شەپۆلێکی بەهێزی لافاوەوە پردی پشتێنەیی خورماتوو داڕما و بووە هۆی پەککەوتنی تەواوەتی هاتوچۆ و ئەمڕۆ رێگاکە بەڕوی ئۆتۆمبێلە بارهەڵگرەکاندا کرایەوە.

کردنەوەی رێگاکە بە شێوازێکی کاتییە و لە تەنیشت پردە رووخاوەکەوە رێگەیەکی خۆڵ دروستکراوە و بۆریی تایبەت بۆ تێپەڕبوونی ئاوەکە دانراوە تا هاتوچۆی بازرگانی بەردەوام بێت، بەڵام مەترسیی ئەوە هەیە بە بارانبارین و لافاوێکی دیکە، رێگە کاتییەکەش ئاو بیبات و جارێکی تر هاتوچۆ پەکی بکەوێتەوە.

ئەم رێگەیە شادەماری بەستنەوەی بازرگانییە لە نێوان شارەکانی هەرێمی کوردستان و ناوچەکانی ناوەڕاست و باشووری عێراق و بە داخرانی جوڵەی کاڵا و شتومەک و هاتوچۆی بارهەڵگرەکان بە تەواوی پەکدەخات.

لە چەند رۆژی رابردوودا پارێزگاری سەڵاحەدین سەردانی شوێنەکەی کرد و بەڵێنی دا لەداهاتوویەکی نزیک بە شێوەیەکی بنەڕەتی و هەمیشەیی پردەکە نوژەن بکرێتەوە و دروست بکرێتەوە.

پێداچوونەوە: توانا نەقی