لە ئاکرێ ئۆتۆمبێلێک خەریکبوو ئاو بیبات

شۆڕش قادری

لەناو رووباری گەلی زنتا لە ئاکرێ، ئۆتۆمبێلێک خەریکبوو ئاو بیبات، تیمەکانی بەرگری شارستانی فریای کەوتن و رزگاریان کرد.

بەڕێوەبەرایەتی بەرگری شارستانی ئاکرێ ڤیدیۆیەی ساتی رزگارکردنی ئۆتۆمبێلەکەی بڵاوکردووەتەوە و دەڵێت، بەهۆی بەرزبوونەوەی ئاستی ئاوی رووباری گەلی زنتا ئۆتۆمبێلێک پەکی کەوتووە و مەترسی لەسەر بووە ئاو بیبات، تیمەکانیان بەهانایەوە چوون و بێ هیچ زیانێک رزگاریان کردووە.

هەر ئەمڕۆ کەشناسی کوردستان هۆشداری دابووە لەوەی کە ئەم شەپۆلە بارانەی رووی لە ناوچەکەمان کردووە، لە سبەینێوە بەهێزتر دەبێت و ئەگەری بەرزبوونەوەی ئاستی ئاو و دروستبوونی لافاو لە هەندێک شوێن هەیە.