لێکترازانێکی نوێ لە ناو عەسائیب ئەهلی هەق؛ باڵێک جیابووەتەوە

ئەحمەد مستەفا

بەرپرسێکی باڵای عێراقی دەڵێ، لە ناو ریزەکانی بزووتنەوەی “عەسائیب ئەهلی هەق”، بە سەرکردایەتی قەیس خەزعەلی، لێکترازانێکی ناوخۆیی روویداوە و باڵێک لە گرووپەکە جیابووەتەوە.

بەپێی زانیارییە بڵاوکراوەکانی رۆژنامەی واشنتۆن پۆست و بە پشتبەستن بە قسەکانی ئەو بەرپرسە، باڵە جیابووەکە توانیویەتی دەستی بەسەر بەشێکی گەورەی چەک و کەلوپەلە سەربازییەکانی گرووپەکەدا بگرێت.

سەرچاوەکە هەروەها دەڵێت، ئەم باڵە پشتیوانییەکی گەورەی ئێرانی بەدەستهێناوە و هەماهەنگیی لەگەڵ حوسییەکانی یەمەن هەیە.

بەپێی هەمان راپۆرت، ئەو باڵەی لە عەسائیب جیابووەتەوە، بە هۆکاری پەیوەندییە ناوخۆیی و ناوچەییەکانی لەژێر چاودێرییەکی زیاترە و هەندێک سەرچاوە جەخت لە پەیوەندیی ئەو گرووپە بە هێرشەکانی دوایی دژی سعودیە دەکەن.

تا ئێستا وردەکاریی زیاتر دەربارەی ناسنامەی سەرکردەکان و ژمارەی ئەندامانی باڵە جیابووەکە بڵاونەکراوەتەوە.