حەوت پاسن و لە هەشت شوێنی دهۆک هاوڵاتیان دەگوازنەوە
پاسە بێبەرامبەرەکان بۆ بازاڕی شەوانی رەمەزانی دهۆک ئامادەن
964+
هێڤی دێوالی – دهۆک
لە سبەی شەوەوە حەوت پاسە بێبەرامبەرەکەی دهۆک بۆ گواستنەوەی هاوڵاتیان بۆ بازاڕی شەوانی رەمەزان بەردەستن.
تۆڕی 964 دەزانێت، هەموو شەوێک لە کاتژمێر 8:30 خولەک هاوڵاتیان دەگوازنەوە و لە کاتژمێر 11 تا 12ـی شەو دەیانگەڕێننەوە.
پاسەکان لە سبەینێ دووشەممە 27.3.2023ـەوە دەستبەکار دەبن و لە هەشت شوێنی خیاوازی دهۆک هاوڵاتیان بێبەرامبەر بۆ بازاڕەکە دەگوازنەوە.
رێوار محەمەد، بەرپرسی راگەیاندنی بەڕێوەبەری گەشتوگوزاری دهۆک بە تۆڕی 964ـی وت “ئەو سێ رۆژە کە پاس دابین نەکرا بەهۆی کێشەی تەکنیکییەوە بووە و هاوکات ویستیشمان بازاڕەکە باشتر بە خەڵک بناسێنین”.
ئەو بازاڕە دەکەوێتە نزیک تێرمیناڵی دهۆکەوە و کەلوپەل و پێداویستیی جیاواز جیاوازی تێدا دەست دەکەوێت.
بازاڕەکە رۆژی هەینیی رابردوو 24.3.2023 کراوەتەوە و تەنها شەوانی مانگی رەمەزان کراوە دەبێت و دواتر بازاڕەکە دادەخرێت.
