لە 70%ـی کارەکانی پڕۆژەی گەورەترین نەخۆشخانەی چارەسەری شێرپەنجە تەواو بووە

964+

وریا فەتاح

کارکردن لە پڕۆژەی گەورەترین نەخۆشخانەی چارەسەری شێرپەنجەی لەسەر ئاستی هەرێمی كوردستان و عێراق لە هەولێری پایتەخت بەردەوامە و لە ئێستادا لە 70%ـی تەواو بووە.

نەخۆشخانەكە لە 150 تەختی خەواندن و 100 تەختی چارەسەری كیمیایی پێك دێت و تاقیگەیەك

بەپێى راگەیەندراوى پارێزگاى هەولێر، نەخۆشخانەکە لەسەر رووبەری 30 هەزار مەتر چوارگۆشە دروست دەكرێت و لە پێنج نهۆم پێك دێت. لە رووی توانای لەخۆگرتنەوە، 150 تەختی خەواندن و 100 تەختی تایبەت بە وەرگرتنی چارەسەری كیمیایی تێدا دەبێت.

روونیشى کردووەتەوە کە بە تەواوبوونی پڕۆژەکە، نەخۆشخانەکە دەبێتە سەنتەرێکی پێشکەوتووی پزیشکی و چەندین تەکنەلۆژیای نوێی تێدا بەردەست دەبێت، لەوانە: ئامێرەکانی ئێم ئاڕ ئای (MRI)، سیتی سكان، پێت سكان، چارەسەری تیشك، وێنەگرتنی گاما، هەروەها بەشی تایبەت بە چاندنی مۆخی ئێسك و تاقیگەیەكی زۆر پێشكەوتوو لەخۆ دەگرێت.

پڕۆژەی دروستکردنی ئەم نەخۆشخانەیە، کە دەبێتە گەورەترین سەنتەری شێرپەنجە لە عێراق و هەرێم، لە 18ـی ئەیلوولی 2024 بەردی بناغەی بۆ دانرا و بڕیارە بە خێراترین کات بخرێتە خزمەتی هاوڵاتیانەوە بۆ کەمکردنەوەی ئەرکی نەخۆشانی شێرپەنجە.

+1