داهاتی نانەوتی پارێزگاکانی سلێمانی و هەڵەبجە بۆ کەمتر لە شەش ملیار دینار دابەزی
بزانە بەراورد بە هەفتەی رابردوو چەندە کەمی کردووە؟
داهاتی سلێمانی و هەڵەبجە بۆ کەمتر لە شەش ملیار دینار دابەزی
شۆڕش قادری
داهاتی نانەوتی پارێزگاکانی سلێمانی و هەڵەبجە بەهەردوو ئیدارەی گەرمیان و راپەڕینەوە بۆ کەمتر لە شەش ملیار دینار دابەزی.
بەپێی نوێترین داتا و ئاماری ماڵپەڕی شەفافیەت، داهاتی نانەوتیی هەردوو پارێزگای سلێمانی و هەڵەبجە و هەردوو ئیدارەی راپەڕین و گەرمیان لە رۆژی 29.8.2026ـەوە تا ئەمڕۆ هەینی 4.9.2026، تەنیا پێنج ملیار و 845 ملیۆن و 428 هەزار و 395 دینارە، لەکاتێکدا هەفتەی پێشوو، حەوت ملیار و 720 ملیۆن و 675 هەزار و 535 دینار بوو.
لە داهاتی ئەم هەفتەیەی پارێزگاکانی سلێمانی و هەڵەبجە، بڕی 4 ملیار و 577 ملیۆن و 882 هەزار و 971 دیناری بە شێوەی نەختینە، ملیارێک و 258 ملیۆن و 135 هەزار و 674 دیناریشی چەک و نۆ ملیۆن و 409 هەزار و 750 دیناریشی مقاسە.
ماڵپەڕی شەفافییەت هەموو هەفتەیەک داهاتە نانەوتییەکانی هەریەکە لە پارێزگاکانی سلێمانی، هەڵەبجە و ئیدارە سەربەخۆکانی گەرمیان و راپەڕین دەخاتەڕوو.
ئەو داهاتەی ماڵپەڕەکە ئاشکرای دەکات، لە دەروازە سنوورییەکان، فڕۆکەخانە، گومرگ، کرێی کێش و پێوەرەکان، پێبژاردن و سزای دارایی، پشکنینەکان، رسووماتی بەخشین، ژینگەی ئۆتۆمبێل، تابلۆ و داهاتی شارەوانییەکان، بەدەستهاتووە.