“بارهەڵگرەکە خێرایی زۆر بووە و برێکی نەماوە”

کاردۆست حسێن – هەولێر

هێمن حەمەدەمین وتەبێژی هاتوچۆی هەولێر دەڵێت، ئەو بارهەڵگرەی لە جادەی کەسنەزان کارەستانی نایەوە، خێرایی زۆر بووە و برێکی نەماوە.

پێشنیوەڕۆی ئەمڕۆ چوارشەممە 26.8.2026 لە دووسایدی کەسنەزان لە هەولێر بارهەڵگرێک خۆی بە چەندین ئۆتۆمبێلدا کێشا و ئاگرێکی گەورەی لێکەوتەوە.

جگە لە زیانی ماددی زۆر، رووداوەکە گیانلەدەستدان و برینداربوونی ژمارەیەک کەسی لێکەوتەوە.

لە شوێنی رووداوەکە هێمن حەمەدەمین وتەبێژی هاتوچۆی هەولێر قسەی بۆ مایکی 964 کردووە و دەڵێت، “بارهەڵگرێک کە گەچی بارکردووە لە کۆیەوە بەرەو ناوشاری هەولێر هاتووە، بەهۆی ئەوەی خێرایی زۆر بووە و برێکی نەماوە، لە ئەنجامدا کۆنتڕۆڵی لەدەستداوە و چووەتە سایدی بەرامبەر”.

“بارهەڵگرەکە خۆی بە زیاتر لە هەشت ئۆتۆمبێلدا کێشاوە و زۆربەی ئۆتۆمبێلەکان گڕیان گرتووە و گیانلەدەستدان و برینداربوون هەیە”، هێمن حەمەدەمین وای وت.

ئاماژەی بەوەشکرد، ئەو ئامارانەی سەبارەت بە قوربانییەکان بڵاودەکرێتەوە ئاماری کۆتایی نییە و دوای لێکۆڵینەوەکان زانیاری دەقیق لەوبارەیەوە بڵاودەکەنەوە.

پێداچوونەوە؛ شۆڕش قادری