بەرکەوتووانی چەکی کیمیاوی بۆ ماوەی 10 رۆژ ئاگاداردەکرێنەوە خۆیان ناونووس بکەن

فەرهاد حەسەن

بەڕێوەبەرایەتی گشتی شەهیدانی هەڵەبجە ئاگاداری ئەو کەسانەی کردووەتەوە کە بەرکەوتەی چەکی کیمیاوین بەڵام مووچەی بەرکەوتەیان نیە و لەو لیستەشدا ناویان نییە کە پێشتر بڵاویان کردووەتەوە، پێیان رادەگەیەنێت سەردانیان بکەن.

ماوەی سەردانیکردنەکەیان 10 رۆژە لە دوێنێ 24.8.2026 دەستیپێکردووە و رۆژی 3.9.2026 یش کۆتایی دێت، مەبەست لە سەردانیکردنیشیان پڕکردنەوەی فۆڕمێکی تایبەتە بە بەرکەوتەی چەکی کیمیاوی .

شەهیدانی هەڵەبجە داوای لە تەواوی هاوڵاتیان کردووە کە هەرکەسێک بناسن کە بەرکەوتەی چەکی کیمیاوی بێت و مووچەی نەبێت، ئاگاداریان بکەنەوە سەردانیان بکەن، بۆ ئەوەی کەس مافی نەفەوتێت .

بۆ ئەوانەی بەرکەوتەی ئەو چەکەن و موچەیان نییە، دەتوانن فۆڕمەکە پڕبکەنەوە، دەبێت کەسەکە خۆی یاخود کەسی یەکەمی، فۆڕمەکە وەرگرێت و پڕیکاتەوە و پێویستیشە کارتی نیشتمانی لەگەڵ خۆی بهێنێت .

ئاگاداریشی کردوونەتەوە کە ئەمە دوایین دەرفەتە هەرکەس لەو ماوەیەدا سەردان نەکات و فۆڕم پڕنەکاتەوە مافی دەفەوتێت، چونکە دەڵێت، ئەو لیژنە پزیشکییەی دروستکراوە بۆ پشکنینی بەرکەوتوان، دواین لیژنە دەبێت .