لەسەر رێگەی کەرکوک بۆ بەغدا
رووداوێکی هاتۆچۆ گیان لەدەستدانی سێ کەسی لێکەوتەوە
سیروان خورشید – خورماتوو
ئێوارەی ئەمڕۆ شەممە 22.8.2028، لە سەر رێگای گشتی کەرکوک – بەغدا لە نێوان قەزاکانی خورماتوو و داقوق رووداوێکی هاتوچۆ روویدا، بەهۆیەوە سێ کەس گیانیان لەدەستدا و یەکێکی تریش بەسەختی بریندار بووە.
شۆفێرەکە کە پیاوە، لەگەڵ دوو ژن دەستبەجێ گیانیان لەدەستداوە.
ئیحسان عەباس، بەڕێوەبەری هاتوچۆ دەرەکییەکانی خورماتوو بە964ـی وت، روداوەکە کاتێک روویدا کە ئۆتۆمبێلەکە “رونساید” پێچەوانەی سایدی خۆی چووەتە سایدی بەرامبەر و سەرەتا خۆی بە ئۆتۆمبێلێکی دیکەدا کێشاوە، پاشان شۆفێرەکە کۆنتڕۆڵی لەدەستداوە و ئۆتۆمبێلەکەی وەرگەڕاوە.
لەرووداوەکەدا دوو ژن و دوو پیاو کە سەرجەمیان ئەندامی یەک خێزانن و نیشتەجێی خورماتوون، لەنێو ئۆتۆمبێلەکەدا بوون و شۆفێرەکە و دوو ژن دەستبەجێ گیانیان لەدەستداوە و پیاوەکەی تریش بەسەختی برینداربووە.
ئیبراهیم خالد، ئێشکگر لە نەخۆشخانەی گشتی خورماتوو بە964ـی وت، تەرمی سێ کەس لەرووداوەکە گەیەندراونەتە نەخۆشخانەمان و بریندارەکەش دوای پێدانی چارەسەری سەرەتایی، بەهۆی سەختی برینەکەیەوە رەوانەی نەخۆشخانەی ئازادی لە کەرکوک کرا.
پێداچوونەوە: ئەحمەد مستەفا
