"هاوشێوەی عەجاج جاش و مستەشارەکان دادگایی بکرێن"
کەسوکاری ئەنفالکراوان داوایان لە سەرۆک کۆمار کرد مافە یاساییەکانیان جێبەجێ بکرێت
فەرهاد حەسەن
کەسوکاری ئەنفالکراوان، زیندانیانی سیاسی و تاقانەکانی ئەنفال چوونە لای سەرۆک کۆماری عێراق و داوایان کرد مافە یاساییەکانیان جێبەجێ بکرێت، کە هێنانەوەی رووفات و قەرەبووکردنەوە دوو لە داواکارییەکانیانن.
بەپێی راگەیەندراوێکی رێکخراوی ئاسۆی زیندانیانی ئەنفال، ئەوان لە روانگەی بەرپرسیارێتیی یاسایی و ئەخلاقیی دەوڵەتی عێراق بەرامبەر بە قوربانیانی رژێمی پێشوو، ئەم یاداشت و داواکارییەیان ئاڕاستەی سەرۆک کۆمار کردووە و داواشیان لێکردووە بەپێی پێگە و دەسەڵاتە دەستوورییەکانی کاربکەن بۆ جێبەجێکردنی مافە یاسایی و مرۆییەکانیان.
لە یاداشتەکەدا ئەم چەند داواکارییە ئاڕاستەی سەرۆک کۆمار کراون:
1- خێراکردنی پرۆسەی هەڵدانەوەی گۆڕەبەکۆمەڵەکان و گەڕاندنەوەی سەربەرزانەی رووفاتی پیرۆزی ئەنفالکراوان بۆ نیشتمان (کە ماوەی دوو ساڵە لە بەغدان)، بەپێی یاسای گۆڕەبەکۆمەڵەکان تاوەکو ئەم رووفاتانە نەگەڕێندرێنەوە، گۆڕی تازه هەڵنادرێتەوە.
2- جێبەجێکردنی موچە و شایستە داراییەکانی زیندانیانی سیاسیی (نوگرەسەلمان، دبس، تۆپزاوە، و مەرکەز شەبابەکەی دووز) بەپێی یاسا بەرقەرارەکان.
3- قەرەبووکردنەوەی مادی و مەعنەویی شایستە و دانیپێدانراو بۆ کەسوکاری ئەنفالکراوان و زیانلێکەوتووانی ئەو تاوانە گەورەیە لەلایەن حکومەتی فیدڕالییەوە، هاوشێوەی دوجێل و کوێت.
4- هاوشێوەی 16ی ئایار (کە رۆژی گۆڕەبەکۆمەڵەکانە) و 16ی ئازار (رۆژی کیمیابارانی هەڵەبجە)، رۆژی 14ی نیسانیش وەک رۆژی ئەنفال لە سەرانسەری عێراقدا بناسرێت.
5- بەردەوامیدان بە وەرگرتنی نموونەی خوێن لە سەرجەم کەسوکار و وارسی ئەنفالکراوان، بە مەبەستی دروستکردنی بنکەی زانیاریی جینیاتی و ناسینەوەی رووفاتەکان.
6- دامەزراندنی کچ و کوڕانی دایک و باوک ئەنفالکراو کە خوێندنیان تەواو کردووە و ژمارەیەکی کەمیان ماوەتەوە.
7- سزادانی بەپەلەی تۆمەتباران: پەلەکردن لە سزادانی تاوانبار (عەجاج).
8- پشتگوێنەخستنی بڕیارەکانی دادگای باڵای تاوانەکانی عێراقی فیدڕاڵ و گرتنەبەری رێکاری یاسایی (هاوشێوەی کەیسی عەجاج) بۆ سەرجەم ئەو جاش و مستەشارانەی دەستیان لە تاوانی ئەنفالدا هەبووە و ئێستا لە ژیاندا ماون.
9- دانانی سندوقێکی هاوکاری لەلایەن حکومەتی عێراقەوە بۆ کەسوکاری سەربەرزی ئەنفالکراوان و زیندانیانی سیاسی.
10- دەرکردنی یاسایەکی تایبەت بە تاقانەکانی ئەنفال، بۆ ئەوەی لە هیچ ماف و ئیمتیازاتێک کە بۆ کەسوکاری ئەنفال دەردەچێت بێبەش نەبن.
11- زیادکردنی بابەتەکانی جێنۆساید و تاوانی ئەنفال بۆ پڕۆگرامی خوێندنی هەموو قۆناغەکان لە سەرانسەری عێراقدا.
12- بە مۆزەخانەکردنی گرتووخانەکانی (نوگرەسەلمان، تۆپزاوە، دبس، و مەرکەز شەبابەکەی دووز).