جلى زستانە ئامادە بکەن؛ کەشەکە بەرەو ساردى دەڕوات

وریا فەتاح

بەپێی پێشبینییەکانی کەشوهەوا بۆ 48 کاتژمێری داهاتوو، گۆڕانکاری بەسەر کەشوهەوای هەرێمی کوردستاندا دێت، ئاسمان هەوراوی دەبێت و پلەکانی گەرما روو لە نزمبوونەوە دەکەن، هاوکات ئەگەری بارانبارین لە چەند ناوچەیەک هەیە.

ئاسمان لە نێوان نیمچەهەور و هەوری تەواودا دەبێت، بەڵام لە ناوچەکانی ڕۆژهەڵاتی هەرێم زیاتر نیمچەهەور دەبێت. پێشبینی دەکرێت تاوەباران و هەورەبروسکەی کورتخایەن لە هەولێر و دەوروبەری تا سنووری قەزای کۆیە ببارێت، لەگەڵ کەمێک نمەباران لە ناوچە شاخاوییەکانی باکووری هەرێم.
پلەکانی گەرما بەراورد بە دوێنێ کەمێک نزم دەبنەوە.
کەشوهەوای سبەی دووشەممە (12-10-2026):
ئاسمان بەگشتی دەگۆڕێت بۆ هەوری تەواو، لەگەڵ ئەگەری بارینی نمەباران لە کات و ناوچەی جیاجیادا.
سەبارەت بە پلەکانی گەرما، لە ناوچەکانی باکوور و ناوەڕاستی هەرێم زیاتر نزم دەبنەوە، بەڵام لە رۆژهەڵاتی هەرێم نزیک دەبن لەو پلەیەی کە ئەمڕۆ تۆمارکراون.

بەرزترین پلەکانی گەرمای پێشبینیکراو بۆ 48 کاتژمێری داهاتوو (بە پلەی سیلیزی):
• هەولێر: ئەمڕۆ 29 | سبەی 28
• سلێمانی: ئەمڕۆ 28 | سبەی 29
• دهۆک: ئەمڕۆ 28 | سبەی 27
• هەڵەبجە: ئەمڕۆ 30 | سبەی 29
• کەرکوک (گەرمیان): ئەمڕۆ 35 | سبەی 34
• زاخۆ: ئەمڕۆ 29 | سبەی 28
• سۆران: ئەمڕۆ 28 | سبەی 27
• ئاکرێ: ئەمڕۆ 29 | سبەی 28
• چەمچەماڵ: ئەمڕۆ 30 | سبەی 30
• پیرمام: ئەمڕۆ 27 | سبەی 25
• حاجی ئۆمەران: ئەمڕۆ 20 | سبەی 19