دایکشیان بەسەختی بریندارە
لە گوڵاڵە بەهۆی تەقینی غاز سێ منداڵ گیانیان لەدەستدا
سیروان خورشید – خورماتوو
لە شارۆچکەی گوڵاڵە بەهۆی تەقینی غازەوە ماڵێک ئاگری گرت و بەهۆیەوە سێ منداڵ گیانیان لەدەستدا و دایکەکەشیان بە سەختی بریندار بووە.
رووداوەکە، شەوی رابردوو لە گەڕەکی وەحدەی ئەم شارۆچکەیە روویداوە.
خالد مەجید، ئێشکگر لە نەخۆشخانەی گەورەی گوڵاڵە بە 964ـی وت، شەوی رابردوو بریندارێکی ژن کە دایکی سێ منداڵە گەیەندراوەتە بەشی فریاکەوتنی نەخۆشخانەکەیان و توانراوە چارەسەری سەرەتایی بۆ بکرێت و لە مردن رزگاری بکەن، بەڵام رێژەی سوتاوییەکەی زۆر بەرزە و سەرووی 80%ـە، لە ئێستادا لە ژێر چاودێری چڕی پزیشکیدایە و دۆخی تەندروستیی ناجێگیرە.
وتیشی “ئەو سێ منداڵەی گیانیان لەدەستداوە، تەمەنیان لە نێوان چوار بۆ نۆ ساڵدا بوون، دوای تەواوبونی رێکار و توێکاریە پزیشکیەکان، تەرمەکان رادەستی کەسوکاریان کراوەتەوە”.
روداوەکە بەم شێوەیە بووە، لەکاتی سەرقاڵبونی دایکەکە بە چێشتلێنان لەناو مەتبەخدا، غاز دەرچووە و بە خێرای تەشەنەی سەندووە و بوەتە هۆی کەوتنەوەی ئاگر و پاشان تەقینی غازەکە، بەهۆی روداوەکەوە سەرجەم کەلوپەلی ماڵەکە سوتاون و دوای گەیشتنی تیمەکانی ئاگرکوژێنەوە بە شوێنی روداوەکە، توانراوە دایکەکە لەناو ئاگرەکە رزگار بکەن، بەڵام منداڵەکان لە ژورەوە ماونەتەوە نەیانتوانیوە خۆیان رزگار بکەن و گیانیان لەدەستداوە.
پێداچوونەوە؛ فەرهاد حەسەن