نەجمەی غوڵامی تێکستێکی مازیار فایەقی کرد بە گۆرانی

ئەحمەد مستەفا

شاعیری لاو مازیار فایەق، تێکستێکی خۆی پێشکەشی هونەرمەندی دیاری کورد، نەجمەدین غوڵامی کرد و ئەویش کردی بە نوێترین بەرهەمی خۆی، کە بەرهەمەکە ناوی “تەمەن”ـە.

نەجمەدین غوڵامی ناسراو بە نەجمەی غوڵامی، گۆرانیبێژ و هونەرمەندێکی دیار و ناسراوی کوردە، کە خاوەن مێژوویەکی دەوڵەمەندە لە مۆسیقا و گۆرانیی کوردی، ئەو لە 21ی ئازاری 1958 لە شاری سنەی رۆژهەڵاتی کوردستان لەدایک بووە.

لە تەمەنی 18 ساڵییەوە دەستی بە کاری هونەری کردووە، نەجمەدین غوڵامی بە دەنگە تایبەتەکەی و هەڵبژاردنی شاکارە شیعرەکانی شاعیرانی کورد ناسراوە. خاوەنی زیاتر لە 100 گۆرانی تۆمارکراوە.

ئێستا رایگەیاندووە، گۆرانی “تەمەن”، لەسەر هۆنراوەیەکی جوانی مازیار فایەق بەرهەم هێناوە، هەرخۆی ئاوازەکەی بۆ داناوە، هەروەها ئامادەکردن و دابەشکردنی موزیکەکە لەلایەن زامیار نامۆ ئەنجامدراوە.

ئەو دەڵێ، هەوڵم داوە بەرهەمێک پێشکەش بکەم، پەیام و هەستێکی قووڵی مرۆیی بگەیەنم، ناوەڕۆکی تەمەن لەسەر ئەو راستییە بنیات نراوە کە هەموو مرۆڤێک، بێ جیاوازی، لە قۆناخەکانی تەمەندا تێدەپەڕێت و دەگاتە قۆناخی پیری.

وەک خۆی دەیگێڕێتەوە، هەوڵی داوە تێکست و ئاواز و ڤیدیۆکلیپەکە بە شێوەیەک بێت کە هەر گوێگر و بینەرێک بتوانێت خۆی لە ناو ئەو چیرۆکەدا ببینێتەوە و هەست بکات ئەم بەرهەمە باس لە ژیانی خۆی دەکات.