ئیدارەی پێنجوێن کەسوکارەکەی ئاگادار دەکەنەوە
“ژنێکی پیر لە بازیانەوە دەبەن بۆ سواڵکردن بۆ پێنجوێن”
بڕوا مەجید – پێنجوێن
بڵاوبوونەوەی وێنەی ژنێکی بەتەمەنی خەڵکی بازیان کە هاوینان لە پێنجوێن بە تەنیا دەهێڵرێتەوە، کاردانەوەی توندی لێکەوتەوە و پەردە لەسەر کەیسی هێنان و بەجێهێشتنی کەسانی بەتەمەن لادرا کە بۆ مەرامی سواڵکردن بەکاردەهێنرێن.
عەدنان کاکە رەش قایمقامی قەزای پێنجوێن بۆ 964 وتی، ”ئەم ژنە بەتەمەنە چەند جارێکە دەهێنرێتە پێنجوێن و بەجێدەهێڵدرێت، بەهۆی خەمخۆری و نەجیبی خەڵکی پێنجوێنەوە دووجار کۆمەکی بۆکۆکراوەتەوە”.
قایمقام دەڵێت”بەدواداچونمان کردووە لەلایەن کەسە نزیکەکانیەوە بەمەبەستی سواڵکردن بەکاری دەهێنن و 24 کاتژمێرمان داناوە بۆئەوەی بێن بیبەنەوە، ئەگینا سکاڵای یاسای تۆماردەکەین”.
لە پێنجوێن هیچ سواڵکەرێکی لێنیە و ناهێڵین دیاردەی سواڵکردن لەم شارە هەبێ، هەرکەسیش پێویستی بەشتێک هەبێ کەسی باش و بەخشندەمان زۆرەو ناهێڵن نەبوونیان پێوەدیاربێ، عەدنان کاکەرەش وای وت.
پێداچوونەوە: توانا نەقی