بەهۆی نەشارەزایی لە مەلەکردن گەنجێکی تەمەن 18 ساڵان لە گوڵاڵە خنکا

+964
سیروان خورشید – دوزخورماتوو

ئێوارەی ئەمڕۆ گەنجێکی تەمەن 18 ساڵان لەکاتی مەلەکردندا لە رووباری ئەڵوەند لە سنووری گوندی “سەید ئەحمەد” سەر بە قەزای گوڵاڵە خنکا تائێستا تەرمەکەی نەدۆزراوەتەوە.

​ئەسعەد حەمید، مەلەوانێکە بەدوای تەرمەکەدا دەگەڕێت، بە 964ـی وت، گەنجەکە بۆ بەسەربردنی کات و مەلەوانی چووەتە ناو ئاوەکە و مەلەوان نەبووە و دەستبەجێ ئاوەکە لەگەڵ خۆی بردوویەتی و خنکاوە و زیاتر لە کاتژمێرێکە بەدوای تەرمەکەی دەگەڕێین، بەڵام بەهۆی خوڕی و چاڵ و زەلکاوی ژێر ئاو و گۆڕانی بەردەوامی ئاستی ئاوەکە، تائێستا نەدۆزراوەتەوە

سەباح رەحیم، ئەفسەر لەبەڕێوەبەرایەتی پۆلیسی جەلەولا بۆ 964 وتی، “دوای ئاگادارکردنەوەمان، تیمەکانی فریاگوزاری و پۆلیسی رووبارەکان گەیشتوونەتە شوێنی رووداوەکە و بە هەماهەنگی لەگەڵ کەسوکاری گەنجەکە و دانیشتووانی گوندەکە هەموو هەوڵێک دەدەین بۆ دۆزینەوەی تەرمەکە بەزووترین کات.

پێداچوونەوە: ژێوار خدر