شارەوانی سلێمانی: بردنە ژوورەوەی کورسی و بە کرێدانی لەناو پارکی هەواری شار قەدەغەیە

+964

شانیا بێستوون – سلێمانی

سەرۆکایەتی شارەوانی سلێمانی خوێندکاران ئاگاداردەکاتەوە، ئاهەنگی دەرچوون لە نێو پارکەکان بێبەرامبەرە و کورسی بردنە نێو پارکەکە و بەکرێدانی قەدەغەیە.

لە دوای بڵاوبوونەوەی گرتەیەک لە سۆشیاڵ میدیا، تێیدا رێگری لە بردنی کورسی دەکرێت بۆ نێو پارکی هەواری شار، کە بە پارە دەرێتە دەرچووانی زانکۆ و کەسووکاریان، هەر زوو سەرۆکایەتی شارەوانی سلێمانی لە رێگەی راگەیەندراوێک هاتە دەنگ.

لە راگەیەندراوەکەی شارەوانیدا هاتووە، بردنەژوورەوەی کورسی و بەکرێدانی بە پارە بە دەرچووانی زانکۆ، بە هەموو شێوەیەک قەدەغەیە، ئەو کارە بەبێ ئاگاداری سەرۆکی شارەوانی و پارکەکە کراوە، هەر زوو بەدواداچوون بۆ کیشەکە کراوە و رێکاری یاسایی جدی بەرامبەر سەرپێچیکاران دەگیرێتەبەر.

شارەوانی سلێمانی باسی لەوەشکرد، دەرگای پارکەکان بەبێ بەرامبەر بە رووی دەرچووانی زانکۆ و کەسووکاریاندا کراوەیە، داوا دەکات ژینگەی پارکەکان بپارێزن.

شارەوانی سلێمانی: بارانبارین چاڵوچۆڵی شەقامەکانی زیادکردووە