خاوەنەکەی چاوەڕێی هاوکارییە
ئەو ئۆتۆمبێلەی لە لۆفەکانی بێخاڵ هەڵدێرا لە شوێنی خۆیەتی
964+
ئاکام غەفور – سۆران
ئەو ئۆتۆمبێلە بارهەڵگرەی دوو رۆژ لەمەوبەر لە لۆفەکانی بێخاڵ لە سنووری ئیدارەی سۆران هەڵدێرا و دوو کەسی تێدا بریندار بوو، لە شوێنی خۆیەتی، خاوەنەکەشی چاوەڕێیە خێرخوازان یارمەتی بدەن بۆ هێنانەوەی ئۆتۆمبێلەکەی.
عومەر ئەحمەد، خاوەنی ئۆتۆمبێلەکەیە و لە نەتەوەی عەرەبە، بە 964ی وت، براکەی بە ئۆتۆمبێلەکەوە هەڵدێراوە و خۆی و ژنەکەی بریندار بوون، ئێستا ژنەکەی بارودۆخی تەندروستی خراپە.
وتیشی، ئەو شوێنەی ئۆتۆمبێلەکەی لێ کەوتووە، زۆر قوڵە و تادانۆی پێویستە، داوای پارەیەکی زۆریش دەکەن و توانای ئەوەی نییە بیهێنتەوە سەرەوە.
حەیدەر حەسەن هاوڵاتییەکی سۆرانە و دەڵێت، دەیانەوێت هاوکاریی ئەو خێزانە بکەن و ئۆتۆمبێلەکە بژێوییان دابین دەکات، لێیان قەوماوە و پێویستە لە رووی ئینسانییەوە یارمەتییان بدەین.
هەروەها خالید حەمەدەمین، کە دراوسێی خاوەنی ئۆتۆمبێلەکەیە، بە 964ی راگەیاند، خێزانەکە هەژارن و کاسبی دەکەن، توانای ئەوەیان نییە ئۆتۆمبێلەکە بهێننە سەرەوە و لێیان قەوماوە، جگە لەوە ژنی پیاوەکەش لە نەخۆشخانەیە و وەزعی باش نییە.
بە گوێرەی لێدوانەکانی خاوەنی ئۆتۆمبێلەکە، بەهۆی نەمانی ئیستۆپەوە ئۆتۆمبێلەکە هەڵدێراوە و زەرەر و زیانێکی زۆریشی بەرکەوتووە.
پێداچوونەوە: ئەرسەلان عەبدوڵا
