گەورەترین پاڵاوگەی جیهان 5 ملیۆن بەرمیل نەوتی لە ئێران کڕی

964+

وریا فەتاح

کۆمپانیای ریلایانسی هیندی، کە خاوەنی گەورەترین کۆمەڵگەی پاڵاوتنی نەوتە لە جیهاندا، بڕی 5 ملیۆن بەرمیل نەوتی خاوی لە ئێران کڕیوە. ئەم هەنگاوە تەنها چەند رۆژێک دوای ئەوە دێت کە ویلایەتە یەکگرتووەکانی ئەمریکا بە شێوەیەکی کاتی سزاکانی سەر نەوتی ئێرانی هەڵگرت.

ئاژانسی رۆیتەرز لە زاری سێ سەرچاوەی ئاگادارەوە بڵاویکردەوە، کۆمپانیا هیندییەکە ئەم بڕە نەوتەی لە “کۆمپانیای نیشتمانیی نەوتی ئێران” کڕیوە. ئەمەش یەکەم کڕینی گەورەی نەوتی ئێرانە لەلایەن هیندستانەوە دوای گۆڕانکارییەکانی ئەم دواییەی سیاسەتی ئەمریکا بەرامبەر تاران.

سەبارەت بە نرخی نەوتە کڕدراوەکە، یەکێک لە سەرچاوەکان ئاماژەی بەوە کردووە کە ریلایانس نەوتەکەی بە زیادەی نزیکەی 7 دۆلار بۆ هەر بەرمیلێک لەسەرووی نرخی گرێبەستە دواخراوەکانی خاوی برێنت (ICE Brent) کڕیوە.

هەرچەندە رێککەوتنەکە واژۆ کراوە، بەڵام تاوەکو ئێستا کاتی وردی گەیشتن و رادەستکردنی بارە نەوتەکان بە پاڵاوگەکانی کۆمپانیای ریلایانس لە هیندستان دیار نییە.

ئەم کڕینە ئاماژەیەکە بۆ گەڕانەوەی نەوتی ئێران بۆ بازاڕە جیهانییەکان، بەتایبەت بۆ کڕیارە گەورەکانی وەک هیندستان، کە پێشتر بەهۆی سزاکانی ئەمریکاوە کڕینی نەوتیان لە تاران راگرتبوو.