بەبێ ناوهێنانی ئێران؛ سەرۆکایەتی کۆمار ئیدانەى بۆردومانەکەی سەر پێشمەرگە دەکات

وریا فەتاح

سەرۆکایەتی کۆماری عێراق لە بەیاننامەیەکی فەرمیدا، بە توندی سەرکۆنە و ئیدانەی ئەو بۆردومانەی کرد کە هێزەکانی پێشمەرگەی لە سنووری قەزای سۆران کردە ئامانج، کە بەهۆیەوە ژمارەیەک پێشمەرگە شەهید و بریندار بوون.

سەرەڕای ئەوەی حکومەتى هەرێم ئاشکراى کرد کە هێرشەکە لەلایەن کۆماری ئیسلامیی ئێرانەوە ئەنجامدراوە، بەڵام لە بەیاننامەکەی سەرۆکایەتی کۆماردا بە هیچ شێوەیەک ناوی “ئێران” وەک لایەنی هێرشبەر نەهێنراوە و تەنها بە دەستەواژەی گشتی وەک “ئەو بۆردومانە” و “دەستدرێژی” ناوى بردووە.

لە بەیاننامەکەدا، سەرۆکایەتی کۆمار وێڕای دەربڕینی هاوخەمی بۆ بنەماڵەی شەهیدان، جەختی لەوە کردووەتەوە کە “هێزەکانی پێشمەرگە کۆڵەکەیەکی سەرەکیی سیستمی بەرگریی وڵاتن و ڕۆڵی باڵایان هەبووە لە تێکشکاندنی تیرۆر و پاراستنی سەقامگیری.”

سەرۆکایەتی کۆمار لە پەیامەکەیدا داوای رێزگرتن لە سەروەریی خاکی عێراقی کردووە و رایگەیاندووە کە پێویستە هەموو جۆرە دەستدرێژییەک بۆ سەر هێزە ئەمنییەکان ڕەت بکرێتەوە، هەروەها جەختی لە گرنگیی هەماهەنگی نێوان هێزە نیشتمانییەکان کردووەتەوە بۆ پاراستنی خوێنی هاوڵاتیان و ئاسایشی وڵات.