بۆماوەى سێ رۆژ؛ حکومەتى عێراق ماتەمینى سەرتاسەرى راگەیاند

وریا فەتاح

بەبۆنەى کوژرانى عەلى خامنەیى رێبەرى باڵاى ئێران، حکومەتى عێراق پەیامێکى بڵاوکردەوە و سێ رۆژ ماتەمینى گشتیى لەسەرانسەرى وڵات راگەیاند.

باسم عەوادی، وتەبێژی فەرمی حکومەتی عێراق لە بەیاننامەیەکدا رایگەیاند: “سەرەخۆشی خۆمان بەبۆنەی شەهیدبوونی رێبەری باڵای ئێران رادەگەیەنین. سەید خامنەیی بەم کۆچە دواییەی، کاروانە پڕ لە خزمەتەکەی بۆ گەلی ئێران بە تاجی شەهادەت و وەفاداری بۆ پرەنسیپەکان گەیاندە لوتکە، لە کاتێکدا وەک بەرگریکارێکی نەتەوەکەی لە دژی ستەم و توندوتیژی وەستابووەوە.”

لە لایەکی ترەوە، حکومەتی عێراق بڕیاریدا بە راگەیاندنی سێ ڕۆژ ماتەمینی گشتی لە سەرانسەری عێراقدا.

وتەبێژی حکومەت دووپاتی کردەوە کە عێراق جارێکی تر بانگەوازی جیدی و دەستبەجێی خۆی ئاراستەی کۆمەڵگەی نێودەوڵەتی دەکات بۆ راگرتنی بێ مەرجی هەموو کار و چالاکییە سەربازییەکان لە ناوچەکەدا، ئاماژەی بەوەش کرد کە ئەم گرژییانە ناوچەکە بەرەو ئاستێکی بێپێشینە لە توندوتیژی دەبەن.