دیمەنی بەغدای پایتەختی عێراق _ وێنە: رۆیتەرز
کۆبوونەوە کراوە و لیژنە خەریکن
عێراق 17 کەسی دەستگیرکرد خەڵکیان دەکرد بە سەربازی روسیی
964+
ئەحمەد مستەفا
راوێژکاریک لە ئاسایشی نەتەوەیی عێراق ئەمڕۆ پێنجشەممە، دەستگیرکردنی 17 کەسی بە تۆمەتی دامەزراندنی عێراقییەکان لە ریزەکانی سوپای روسیادا راگەیاند و وتی، حکومەت رێنمایی داوە بۆ ئەنجامدانی پەیوەندی لەگەڵ لایەنی ئۆکرانی بە مەبەستی گەڕاندنەوەی ئەو عێراقییانەی وەک سەرباز لە ریزی روسیا بوون و ئێستا لای ئۆکرانیا دیلن.
هەروەک، جەختی لە نزیکبوونەوەی سەردانی شاندێکی حکومی بۆ مۆسکۆ کردەوە بۆ زانینی ژمارەی راستەقینەی ئەو عێراقییانە.
سەعید جەیاشی، راوێژکاری ستراتیژی لە راوێژکاریی ئاسایشی نەتەوەیی و ئەندامی لیژنەی باڵای راسپێردراو بۆ بەرەنگاربوونەوەی دامەزراندنی عێراقییەکان لە سوپای روسیا بە ئاژانسی هەواڵی عێراقی وت، حکومەتی عێراق بایەخێکی زۆری بە بابەتی دامەزراندنی “تەجنیدکردنی” عێراقییەکان لە سوپای روسیا داوە و لیژنەیەکی باڵای بە سەرۆکایەتی راوێژکاری ئاسایشی نەتەوەیی و ئەندامییەتی لایەنە ئەمنی و هەواڵگرییەکان پێکهێناوە.
لیژنەکە زنجیرەیەک کۆبوونەوەی لەگەڵ ئەنجومەنی باڵای دادوەری و بەتایبەت لەگەڵ دادوەر فایەق زێدان ئەنجامداوە بۆ دیاریکردنی ئەو یاسایانەی کە دەکرێت لەرێگەیانەوە بەرەنگاری ئەم دیاردەیە و حاڵەتەکانی دامەزراندنی گەنجانی هەژاری عێراق ببنەوە بۆ ناو شەڕێک کە عێراق هیچ بەرژەوەندییەکی تێدا نییە.
جەیاشی وتی، ئەنجومەنی باڵای دادوەری هاوکارییەکی زۆری کردووە و ماددەی 165ی یاسای سزادانی عێراقی دیاری کردووە کە هەر هاووڵاتییەکی عێراقی تاوانبار دەکات گەر بەبێ رەزامەندی حکومەتی عێراق بچێتە ناو هێزە چەکدارە بیانییەکانەوە و سزای توندی بۆ داناوە، لیژنەکە چەندین کۆبوونەوەی لەگەڵ باڵیۆزی روسیا لە بەغدا و وەزارەتی دەرەوە ئەنجامداوە سەبارەت بە کێشەی پێدانی “ڤیزای” روسی لە رێگەی کونسوڵخانەکانی روسیا لە بەسڕە و هەولێر.
وەک باسی دەکات، هۆشداریش دراوەتە لایەنی روسی ئەو رێکارانە نایاسایین و گەنجانی عێراقی لە رێگەی گرێبەستی ساختە یان بۆ مەبەستی خوێندن پەلکێش دەکرێن و دواتر ناچار دەکرێن ببنە سەرباز، وەک ئەوەی بەسەر هونەرمەندێکی عێراقیدا هاتبوو کە لە ڤیدیۆیەکدا باسی لەوە کردبوو چۆن فێڵی لێکراوە و ناچارکراوە.
