ژمارەیەک داربەڕووی جوانی لە قەرەداغ بڕییەوە، دەستگیر کرا – وێنە؛ پۆلیسی دارستان و ژینگەی سلێمانی
بەم رەمەزان و دەمەو بەهارە
ژمارەیەک داربەڕووی جوانی لە قەرەداغ بڕییەوە؛ دەستگیر کرا
شۆڕش قادری
بەم رەمەزان و دەمەو بەهارە ژمارەیەک داربەڕووی سەوز و جوانی لە ژینگەی قەرەداغ بڕییەوە، پۆلیس پێیزانی و دەستگیریان کرد.
بەڕێوەبەرایەتی پۆلیسی دارستان و ژینگەی سلێمانی چەند وێنەیەکی دارە بڕاوەکانی بڵاوکردووەتەوە و نووسیویەتی، لەئەنجامی گەڕان و پشکنینی سنووری چالاکی بەشەکەیان، مەفرەزەیەکی بەشی پۆلیسی دارستان و ژینگەی قەرەداغ، توانیویانە لە سنووری گوندی (گەڕەزیل) سەرپێچیکارێک بە تۆمەتی بڕینی داری سروشتی لەجۆری بەڕوو دەستگیر بکرێت کە هەستاوە بە بڕینی چەند درەختێک لە سنووری گوندەکەیان .
ئاماژە بەوەشکراوە، دەستیانگرتووە بەسەر دارە بڕدراوەکاندا لەگەڵ مشارێکی داربڕین و تەوراسێکدا، پەڕاوی لێکۆڵینەوە بۆ رووداوەکە کراوەتەوە و بەمەبەستی وەرگرتنی رێکاری یاسایی، رادەستی دادوەری لێکۆڵینەوە دەکرێت.
