چۆمان - حاجی ئۆمەران
ئۆتۆمبێلی دەبڵ ئەكسڵ و زنجیرت نییە خۆتان لەو رێگایە مەدەن
964+
ئاكام غەفوور
بەفربارینی بەردەوام، ئاستەنگی هاتوچۆی لە سنووری ئیدارەی سەربەخۆی سۆران دروست كردووە، بۆیە رێنمایی هاوڵاتیان دەكرێت خۆیان لەو رێگەیە نەدەن، ئەگەر ئۆتۆمبێلەكانیان دەبڵ ئەكسڵ نییە و زنجیریان لە تایە نەبەستاوە.
خوسرەو سادق بەڕێوەبەری پاراستن و چاككردنی رێگاوبانی سۆران، ئەمڕۆ چوارشەممە 14.1.2026 بە 964ی راگەیاند، بەفرێكی زۆر باریوە و تیمەكانیشیان لە چەند ناوچە و رێگەیەك خەریكی پاككردنەوەن.
وتیشی، هاتوچۆی رێگای چۆمان بۆ حاجی ئۆمەران ئاساییە، بەڵام ئەو ئۆتۆمبێلانەی دەبڵ ئەكسڵ نین و زنجیریان لە تایە نەبەستاوە، با خۆیان لەو رێگەیە نەدەن و بە دووردەبن لە مەترسی.
وتیشی، رێگەی زینی وەرتێ بە ئەگەری زۆر داخراوە، چونكە یەك ئامێرمان لەو رێگەدا هەیە و بەفریش بەردەوام دەبارێت و پێڕاناگات.
خوسرەت سادق داوای لە شۆفێران و هاوڵاتیان كرد، “رێنماییەكانی ئێمە و پۆلیسی هاتوچۆ جێبەجێ بكەن”.
هەر بەهۆی بەفربارین و سەرمای زۆرەوە ئەمڕۆ لە چۆمان و حاجی ئۆمەران پشووی فەرمییە و دەروازەی نێودەوڵەتیی حاجی ئۆمەرانیش راگەیاندراوی بۆ هاوڵاتیانی كوردستان و ئێرانیش هەیە، كە ئەگەر زۆر ناچار نەبوون روو لە دەروازەكە نەكەن.
پێداچوونەوە: ئەرسەلان عەبدوڵا
