سوپای سوریا گەڕەكە كوردییەكانی حەلەب بۆردومان دەكات

964+

ئەرسەلان عەبدوڵا

سوپای سوریا بۆردومانی گەڕەكە كوردییەكانی شێخ مەقسود و ئەشرەفییە دەكات لە حەلەب، لە ئەنجامدا ژنێک كوژراوە و 17 هاوڵاتییش بریندارن.

ئاژانسی هاوار نیوز ئەمشەو بڵاویكردەوە، هێرش و بۆردومانەكانی سوپای سوریا بۆ سەر گەڕەكەكانی شێخ مەقسود و ئەشرەفییە بەردەوامە، تا ئێستاش ژنێكی تەمەن 57 ساڵ گیانی لەدەستداوە و 17 هاوڵاتی دیكەش بریندارن.

سەرچاوەكە دەڵێت، ئەو ژنەی كوژراوە ناوی فەدوە محەمەد كوردییە و تەمەنی 57 ساڵە، هەروەها ناوی هەر 17 برینداریشی بڵاوكردووەتەوە.

باسی ئەوەش دەكات، هێرشەكان و بۆردومانی هەردوو گەڕەك بە قورسی لە لایەن هێزەكانی حكومەتی سوریا بەردەوامن.

هاوكات روانگەی سوری بۆ مافەكانی مرۆڤ بڵاویكردەوە، رەوشی ئەمنی لە باكووری شاری حەلەب بە تەواوی تێكچووە و شەڕ و پێكدادان لە نێوان هێزەكانی حكومەتی ئەحمەد شەرع و هێزەكانی هەسەدە بەردەوامە.

هەسەدە حكومه‌تى دیمه‌شق بە به‌رپرسیاری راستەوخۆ دەزانێت لەوەی لە حەلەب روودەدات